Vladimir Bruçi u godit me sende të forta dje në lagjen “Rus” të Shkodrës për një vend parkimi. Ky është konkluzioni i policisë lokale që njoftoi këtë të martë arrestimin e një personi lidhur me ngjarjen dhe shpalljen në kërkim të pesë personave të tjerë.
Në pranga është vënë Edmond Sakicaj, 47 vjeç. Ndërsa në kërkim janë shpallur: Izmir Sakicaj, 23 vjeç, Samet Halluni, 27 vjeç, Arlind Kajoshi, 31 vjeç, Samuel Troshani, 24 vjeç dhe Alban Bruçi, 27 vjeç.
Personat e sipërpërmendur “e kanë goditur fizikisht dhe me sende të forta, gjatë konfliktit për vendparkimin e automjeteve 62-vjeçarin, i cili vijon të jetë në kujdesin e mjekëve. Nga veprimet hetimore dyshohet se shtetasi Edmond Sakicaj ka patur me vete armë zjarri, ndërsa Arlind Kajoshi, dyshohet se ka kryer veprime që pengojnë zbulimin e ngjarjes”, njoftoi policia.
Ndaj të arrestuarit dhe personave në kërkim rëndojnë akuzat për veprat penale “Vrasja”, kryer në bashkëpunim, mbetur në tentativë, “Mbajtja pa leje dhe prodhimi i armëve, armëve shpërthyese dhe municioneve” dhe “Veprime që pengojnë zbulimin e së vërtetës”.
Hetimet për rastin vijojnë.
Discussion about this post