Në kuadër të 79-vjetorit të Kryengritjes së Postribës, një nga ngjarjet më të rëndësishme dhe më domethënëse të historisë së rezistencës shqiptare kundër komunizmit, sot u zhvilluan homazhe dhe një ceremoni përkujtimore në Postribë.
Në këtë aktivitet mori pjesë edhe Sekretari i Përgjithshëm i Partisë Demokratike, Flamur Noka, i cili në fjalën e tij theksoi se kjo ditë është një simbol i qëndresës dhe sakrificës për lirinë e Shqipërisë.
Noka kujtoi me nderim burrat e guximshëm që, nën drejtimin e Jul Kazazit dhe Osman Haxhisë, vendosën të sfidojnë një diktaturë mizore në kulmin e saj, duke ngritur flamurin e lirisë dhe duke refuzuar çdo formë nënshtrimi.
Ai shprehu mirënjohje të pakufishme për trashëgimtarët e tyre dhe për banorët e Postribës që prej dekadash mbajnë gjallë idealet e demokracisë dhe të lirisë.
Duke e krahasuar kohën e sotme me periudha të errëta të së kaluarës, Noka paralajmëroi se Shqipëria rrezikon të përballet me një diktaturë të re, që sipas tij është edhe më e egër se ajo e së kaluarës, duke bërë thirrje për qëndresë dhe unitet.
“I nderuar zoti nënkryetar i PD dhe drejtues politik i qarkut Shkodër, i nderuar zoti sekretar e i nderuar zonja deputete, të nderuar këshilltarë të opozitës në bashkinë Shkodër, përfaqësues të përndjekur politik, motra dhe vëllezër trashëgimtarë të denjë të këtyre luanëve që luftuan e sakrifikuan jetën e tyre për të mbrojtur Shqipërinë nga një diktaturë e cila do të sillte vetëm zi, vdekje, robëri dhe varfëri për shqiptarët.
Ju drejtohem ju si pasardhës të tyre, në emër të kryetarit të PD Sali Berishës, për t’ju përcjellë një respekt dhe mirënjohje të pakufijshme të burrave që nën drejtimin e Jul Kazazit dhe Osman Haxhisë, trim që vendosën të ngrihen mbi gjithçka duke mos pranuar konfrontimin me diktaturën, duke u ngritur të ndërgjegjshëm për të sakrifikuar vetëm me një kusht: ata ishin njerëz të lirë dhe donin të jetonin si njerëz të lirë, pa pranuar të nënshtroheshin dhe nder e lavdi për këta burra.
Një mirënjohje edhe për ju zonja e zotërinj të Postribës, si pasardhës të denjë të tyre që keni treguar në 79 vite që nuk nënshtroheni apo hyni në marrëveshje me të keqen, pavarësisht ngjyrës e formës që ka pasur ajo, keni respektuar vlerat që këta burra ranë: lirinë dhe demokracinë. Mirënjohje për ju që keni mbështetur PD dhe forcën e saj përmes asaj që përfaqëson.
Sot po kujtojmë këta burra që luftuan dhe kjo është më e pakta që ne mund të bëjmë, ju heronj se bashku me postribas të tjerë e keni ditur se nuk ishte e lehtë të përballeshin me një kuçedër që ishte në kulmin e saj. Ata e dinin se nuk ishte e lehtë të përballesh me një diktaturë, por ata vendosën dinjitetin e lirinë mbi gjithçka.
Ata refuzuan që të jetonin në robëri, ata luftuan për liri! Sot i kujtojmë ata dhe sot po në këtë datë kujtojmë jo vetëm këta që u ngritën në Postribë, por kujtojmë çdo antikomunist që ka refuzuar diktaturën, edhe pse sot për fat të keq jemi në një kohë që po jetojmë një diktaturë edhe më të egër se ajo bolshevike.
Diktatura e narkos është më e egër sepse diktatura komuniste nuk e bëri të njëjtën gjë, nuk shpopulloi Shqipërinë, të largojë ajkën dhe po tenton çdo ditë.
Narkosi po u thotë shqiptarëve se duhet të jenë anëtarë të karteleve, të jesh patronazhist pa identitet, pa normë e pa moral.
Është detyra e Partisë Demorkatike që kësaj shoqërie t’i prijë në këtë betejë, të mos ketë tërheqje dhe ne do ta fitojmë”, u shpreh Noka.
Discussion about this post