Një minutë heshtje është mbajtur këtë të mërkurë (6 gusht) sot në Hiroshima, saktësisht në kohën kur një bombë atomike u hodh në qytetin japonez 80 vjet më parë, gjatë një ceremonie vjetore ku morën pjesë më shumë se njëqind vende.
Më 6 gusht 1945, në orën 08:15, forcat e armatosura amerikane hodhën një bombë atomike në Hiroshima, duke vrarë afërsisht 140,000 njerëz.
Tre ditë më vonë, një bombë e dytë atomike u hodh nga një aeroplan amerikan në Nagasaki, në Japoninë jugore, duke vrarë 74,000 njerëz të tjerë.
Këto bombardime, të cilat përshpejtuan fundin e Luftës së Dytë Botërore, janë të vetmet raste në histori ku armët bërthamore u përdorën në kohë lufte.
Ndërsa shumë nga pjesëmarrësit vendosën kurora në një varr në kujtim të viktimave, Hiroshima i bëri thirrje edhe një herë botës të braktiste armët bërthamore.
“SHBA-të dhe Rusia mbajnë 90% të kokave bërthamore në botë dhe, në sfondin e pushtimit të Ukrainës nga Rusia dhe tensioneve në Lindjen e Mesme, po vërejmë një trend të forcimit të ushtrive. Disa udhëheqës pranojnë idenë se ‘armët bërthamore janë të nevojshme për mbrojtjen e tyre kombëtare’, në një shpërfillje flagrante të mësimeve që bashkësia ndërkombëtare duhet të kishte nxjerrë nga tragjeditë e historisë. Ato kërcënojnë të minojnë kornizat për konsolidimin e paqes“, theksoi kryebashkiaku Kazumi Matsui.
Ky i fundit ftoi një muaj më parë Donald Trump për një vizitë në Hiroshima, pas krahasimit që presidenti amerikan bëri mes sulmeve ajrore mbi Iranin me hedhjen e bombave atomike mbi Japoninë në vitin 1945.
“Vendi ynë, i vetmi komb që ka vuajtur nga bombardimet atomike në kohë lufte, ka një mision për të udhëhequr përpjekjet ndërkombëtare për një botë pa armë bërthamore”, tha kryeministri japonez Shigeru Ishiba në Hiroshima.
Sipas bashkisë së Hiroshimës, në eventin e sotëm morën pjesë përfaqësues nga 120 vende dhe rajone, si dhe Bashkimi Evropian. Franca u përfaqësua nga zëvendëskomandanti i ambasadës së saj.
Discussion about this post