Nëntë persona janë plagosur me thikë gjatë një sulmi në një tren pranë Kembrixhit, në Anglinë Lindore, mbrëmjen e së shtunës. Policia Britanike e Transportit ka bërë të ditur se dy burra janë arrestuar në lidhje me ngjarjen, e cila është cilësuar nga kryeministri Keir Starmer si një “incident i tmerrshëm”.
Ngjarja ndodhi në një tren që ndaloi në stacionin Huntingdon rreth orës 19:39 të mbrëmjes. Policia e armatosur ndërhyri menjëherë, ndërsa treni u ndal për të mundësuar arrestimin e dy të dyshuarve.
Në një deklaratë, shefi i Policisë Britanike të Transportit (BTP), Chris Casey, tha se policia kundër terrorizmit po mbështet hetimet për të përcaktuar rrethanat dhe motivin e sulmit.
“Po kryejmë hetime urgjente për të përcaktuar se çfarë ka ndodhur dhe mund të duhet pak kohë para se të jemi në gjendje të konfirmojmë diçka më tej,” tha Casey, duke shtuar se në këtë fazë të hershme “nuk do të ishte e përshtatshme të spekulohej mbi shkaqet e incidentit.”
Kryeministri Keir Starmer reagoi përmes një deklarate në platformën X, duke e cilësuar ngjarjen “thellësisht shqetësuese”.
“Mendimet e mia janë me të gjithë ata që janë prekur dhe falënderimet e mia shkojnë për shërbimet e emergjencës për reagimin e tyre. Kushdo që ndodhet në zonë duhet të ndjekë këshillat e policisë,” shkroi Starmer.
Edhe Sekretarja e Brendshme, Shabana Mahmood, shprehu trishtimin e saj për sulmin, duke u bërë thirrje qytetarëve të shmangin komentet dhe spekulimet deri në përfundimin e hetimeve.
Hetimet për incidentin vazhdojnë, ndërsa autoritetet ende nuk kanë bërë të ditur nëse ngjarja ka lidhje me terrorizmin.
Discussion about this post