Sot u mbushën 9 vite prej ndarjes nga jeta të këngëtares së mirënjohur shqiptare Vaçe Zela.
Vëllai i saj Hysni Zela tregon edhe amanetin e fundit të së motrës e cila kishte kërkuar që të prehet Shqipëri, edhe pse mbylli sytë përgjithmonë në Zvicër.
“Duhet të ishit ju atje që të ma besonit mua suksesin e asaj. Sukses i jashtëzakonshëm. Aty ku fillonte dhe këndonte ajo, aty fillonte arti shqiptar. Ajo ndërroi jetë në Zvicër dhe ishte dëshira për ta kthyer këtu. Të më çoni në Shqipëri, të më kaloni nga Kosova. Atje gjithë publiku dhe populli Kosovar i bënë një pritje të jashtëzakonshme”, deklaroi ai.
Zela theksoi se e motra kishte mbështetur gjithmonë artistët e rinj ndërsa ndau edhe disa nga këshillat që i kishte dhënë gjithmonë para se të dilte në skenë.
“Ajo ishte jashtë mase tolerante. Ishte njeri që ndihmonte shumë edhe këngëtarët e tjerë. Gjithmonë shkonte me mendimin se do dalin edhe artistë të tjerë. Ajo fliste me një kënaqësi për zërat e rinj dhe brezat që do të vijnë.
Sa herë që hynte në biseda ajo do përmendte Shqipërinë. E kaloi pjesën më të madhe të jetës me suksese. Ishte njeri që nuk mund të rrinte pa duartrokitje. Hynte në skenë si uragan”, u shpreh Zela.
Discussion about this post