Sot shënohet dita e 91-të e protestës qytetare kundër qeverisë dhe kryeministrit Edi Rama, ndërsa qytetarët vijojnë të mblidhen në Tiranë me kërkesën për dorëheqjen e kryeministrit dhe ndryshimin e sistemit politik.
Protesta vijon pas 90 ditësh të njëpasnjëshme mobilizimi qytetar, gjatë të cilave protestuesit kanë marshuar nga sheshi “Skënderbej” drejt Kryeministrisë dhe kanë përcjellë mesazhe kundër qeverisë.
Kërkesa kryesore e protestuesve mbetet dorëheqja e Edi Ramës, ndërsa në platformën e tyre përfshihet edhe krijimi i një qeverie tranzitore me mandat 12-mujor dhe ndryshimi i kursit politik në vend.
Në protestën e mbrëmshme, qytetarët marshuan në rrugët e kryeqytetit me thirrje si “Ndryshim sistemi! Revolucion!”, “Arrestoni Ramën dhe Ballukun!” dhe “Shqipëri e rinisë, jo e partisë!”, duke deklaruar se nuk do të tërhiqen deri në plotësimin e kërkesave të tyre.
Edhe pas 90 ditësh, protestuesit vijojnë ta cilësojnë lëvizjen si një revoltë qytetare kundër klasës së vjetër politike. Gjatë protestës së 90-të, pankartat e tyre përcollën edhe mesazhin “90 ditë, një kërkesë: llogaridhënie”, ndërsa organizatorët paralajmëruan se protesta do të vazhdojë.
Dita e 91-të pritet të vijojë me mbledhjen e qytetarëve në shesh dhe marshimin në rrugët e Tiranës, ndërsa protestuesit kërkojnë që presioni qytetar të vazhdojë deri në një ndryshim politik.
Ndërsa më 12 shtator është paralajmëruar protestë kombëtare, ku pritet që kësaj revolte t’i bashkohet edhe Diaspora.
Discussion about this post