Në prezantimin e buxhetit të vitit 2022 për Policinë e Shtetit, ishte i pranishëm edhe kryeministri Edi Rama. Kreu i qeverisë e nisi fjalën e tij duke dënuar dhunën e efektivit ndaj gazetares Anila Hoxha dhe operatorit gjatë raportimit të lajmit për vrasjen e biznesmenit Rruzhdi Hoxha në malin e Dajtit.
Rama e konsideroi ngjarjen si të patolerueshme, ndërsa tha se personat që veprojnë në këtë mënyrë, duhet të përjashtohen me urgjencë nga Policia e Shtetit.
“Respekt për punonjësit dhe drejtuesit e Policisë së Shtetit për sakrificat lodhjet dhe për rezultatet. Është për të ardhur keq kur policë të caktuar me uniformën e policisë, siç ishte rasti i dikujt që keqtrajtoi në mes të rrugës një gazetare, jo për faktin se vajza ishte gazetare, por për faktin se duke qenë gazetare ngjarja u bë më e bujshme, por në thelb për faktin që keqtrajtimi i një qytetari, hedh hije mbi gjithë këtë punë dhe mbi këto sakrifica apo rezultate. Dhe patjetër që çdo njëri prej jush, punonjësve të Policisë së Shtetit që çdo mëngjes del nga shtëpia për të shkuar në një front të vështirë, nuk e meriton që punën e tij dhe në imazhin e uniformës që ai dhe ajo veshin, të ketë të tilla stërkala balte që vijnë nga shkelja e patolerueshme e vijës së sjelljes së punonjësit të policisë. E rëndësishme është të veprohet siç u veprua dhe siç është vepruar me shpejtësi, dhe pa asnjë tolerancë ndaj këtyre individëve duke i larguar me nga policia”, tha Rama.
Për kryeministrin, këto gjeste e turpërojnë policinë, e cila duhet të jetë mishërim i ligjit.
Discussion about this post