Naftëtarët e Ballshit do të marrin sërish pagë nga buxheti i shtetit edhe për dy vitet në vijim, pas përfundimit të marrëveshjes që këta të fundit kishin me qeverinë.
Lajmin e bëri të ditur ministrja e Infrastrukturës dhe Energjisë, Belinda Balluku në Komisionin e Veprimtarisë Prodhuese, kur tha se 830 naftëtarët do kompensohen secilin me pagë 30 mijë lekë në muaj.
“Naftëtarët e Ballshit do të marrin përsëri pagë nga buxheti i shtetit në vitin që vjen. Të 830 naftëtarët në kushte të papunësisë pasi nuk punon rafineria e Ballshit do i kompensojë me 300 milionë lekë, paga do të jetë 30 mijë lekë. Për të gjithë naftëtarët që nuk rifillojnë punë si në rafineri apo diku tjetër, ne si ministri do të marrim përsipër edhe financimin e tyre në vitin 2023”, tha Balluku.
Kështu, naftëtarët do të marrin 10 mijë lekë më pak krahasuar me pagën që morën deri në fund të muajit tetorit, në bazë të marrëveshjes së arritur me kryeministrin Edi Rama vitin e kaluar.
Discussion about this post