Përplasjet mes Partisë Demokratike dhe Lëvizjes Socialste për Integrim sa vijnë e shtohen. Pas deklaratës së sekretarit të Përgjithshëm të PD, Gazmend Bardhi për propozimin e listave të përbashkëta në zgjedhjet e 25 prillit, ka reaguar nënkryetari i LSi, Petrit Vasili.
Vasili ka hedhur poshtë pretendimet e Bardhit, duke thënë se nuk ka pasur asnjë propozim për mandatet, dhe këtë sipas tij mund ta vërtetojnë dhe anëtarët e kryesisë së PD.
“Në respekt të qytetarëve, mijëra qytetarëve opozitarë të cilët me ndershmëri deshën ndryshimin është momenti për të thënë të vërtetat e mëdha siç janë e për të mos heshtur më. E vërteta e madhe është që s’ka pasur kurrë qoftë dhe një propozim të vetëm zyrtar nga partia e Lulzim Bashës për mandate, për numra mandatesh e gjëra të kësaj natyre. Anëtarët e kryesisë së Partisë Demokratike janë aty, anëtarët e Këshillit Kombëtar të Partisë Demokratike janë aty, le të thonë a kanë parë ndonjë propozim të tillë? E nëse ka një propozim të tillë zyrtar, këtë dokument le t’ia vënë në dispozicion mediave shqiptare që ta njohin por një dokument i tillë nuk ekziston dhe faqja e zezë për ata që mashtrojnë pasi kanë shitur interesat e opozitës ditën për diell”, tha Vasili.
Vendimin për djegien e mandateve me justifikimin se ky veprim do njihej nga kancelarja gjermane, asokohe Angela Merkel, LSI e konsideron si një mashtrim.
“Bojkotimi i pushtetit lokal, mbështetëm këtë veprim politik, se sërish u vu në tavolinë që plani gjerman vazhdon për zgjedhje të parakohshme dhe garancitë janë të mëdha. Në fakt ishte sërish një mashtrim tjetër i poshtër. Ky plan kishte vetëm miratimin e Edi Ramës dhe të asnjë ndërkombëtari në funksion të kapjes së pushtetit të fundit nga Edi Rama që ishte pushteti lokal. Dhe këtu LSI përveçse mbështetjes luajale nuk bëri asgjë tjetër, ndërkohë që mashtruesit e planit Basha-Rama u vunë në funksionim të dorëzimit të të gjitha llojeve të pushteteve në Shqipëri e për të realizuar kapjen totale të shtetit në grusht në shkëmbim të interesave financiare tepër të rënda dhe të rëndësishme reciproke të të dyja palëve në këtë pazar. Ka pasur dakordësi për të zhvilluar fushatë të përbashkët në çdo qark të vendit, kurrë nuk ndodhi, u sabotua dhe u refuzua nga Basha, i cili nuk mori pjesë as në takimin mbyllës të LSI sepse axhenda Rama-Basha kërkonte të shkatërronte LSi. LSI nuk ka pasur asnjë propozim nga Basha”, shtoi ai.
Sekretari i Përgjithshëm i PD-së, Gazment Bardhi tha më herët se PD i ofroi 15 mandate të sigurta LSI-së më 25 prill, por kjo e fundit tha se 34 i siguronte e vetme duke mos pranuar që të futeshin në zgjedhje me një listë të vetme.
Discussion about this post