Banorët e Shkozës kanë dala në protestë për shkak të mungesës së infrastrukturës në zonën ku jetojnë. Banorët shprehen të indinjuar se shtëpitë e tyre janë izoluar pasi në këtë lagje problematike nuk ka rrugë, ndërsa i kërkojnë autoriteteve që të ndërtohet infrastruktura nëntokësore dhe të asfaltohet rruga.
Protestuesit gjithashtu hedhin akuza se në këtë zonë është tjetërsuar projekti, ndërsa thonë se çështjen do ta çojnë në SPAK.
“Prej 7 vitesh që kur është dhënë leja e banimit në këtë pallat s’kemi as rrugë, dhe projekti u tjetërsua. Kjo çështje do shkojë në SPAK, tek deputeti i zonës, janë rreth 100 fëmijë që luajnë në pluhur pa asnjë element qytetarie. Gjatë fushatës ka pasur premtime por ata ndërtuan pa leje, premtimi i deputetit ishte që ne anulojmë projektin. Këtu është korrupsion i gjallë. Le ta gjejnë organet e drejtësisë, deputetit ka marrë votat dhe ka tjetërsuar projektin. Eskavatori punon mes betonave, nuk është projekt ky. Veliaj nuk ka qenë në zonë për këtë çështje, ne i jemi drejtuar kryetarit dhe përgjigja ishte kjo, zona juaj kërkon një projekt sepse i mungon infrastruktura nëntokësore”, tha një protestues.
Banorët i kanë kërkuar kryetarit të Bashkisë, Erion Veliajt që t’i japë zgjidhje kësaj situate, ndryshe nuk do t’i ndalin protestat, edhe nëse përplasen me policinë.
“Ne nuk kemi rrugë, jemi të bllokuar, nëse pronari vendos të bllokojë rrugën atëherë ne nuk kemi ku të kalojmë. I bëj thirrje Veliajt që të vijë të shikojë problemet e qytetarëve, të mos vijnë vetëm për fushatë”. Duam të na hapin rrugën pastaj të na asfaltojnë rrugën. E kam blerë shtëpinë me kredi në bankë, ne nuk kemi ku të kalojmë. Veliaj dhe Edi Rama të vijnë urgjent se ua kemi dhënë votën, është duke na shpërblyer për votën që i kemi dhënë. Deri në fund do shkojmë me protestë, do bëjmë rezistencën edhe me policinë edhe me të gjithë”, tha një tjetër banor i zonës.
Discussion about this post