Dalin detaje të reja nga skandali që u publikua ditën e sotme në fshatin Zharrëz në Fier, ku 39-vjeçari Sajmir Troka u vu në pranga në polica për shkak se u kap duke bërë gërmime të paligjshme për të ndërtuar një karburant pa leje në këtë zonë. Menjëherë pas arrestimit të tij ka folur vëllai, i cili thotë se gërmime për zhavorr ka kudo në atë fshat dhe askush nuk merr leje dhe nuk ka pasur asnjë ndalim nga policia, sikur i ndodhi vëllait të tij.
Admir Troka pretendon se i vëllai po gërryente dhera në tokën e tij dhe se ato kodra janë shfrytëzuar nga të gjithë prej vitesh për zhavorr. Sakaq, ai tha se do të kërkojë drejtësi, ndërsa mohoi se vëllai do të bënte ndërtim pa leje. “Ai po gërmonte te toka e ti, nuk arrij ta kuptoj pse u arrestua. Të tjerët marrin dhera andej te “Sadiku” e nuk iu thotë gjë njeri. Nuk e di nëse ka marrë leje vëllai se nuk kam qenë këtu. Ne kemi mbi 7 vjet që nuk bëjmë asnjë gërmim aty, vetëm pardje ka filluar të gërmojë vëllai. Ka edhe vende të tjera që gërmohet, ka mbrapa malit andej dhe askush nuk është ndaluar nga policia. Ata që din ligjet ta zgjidhin, por ai ka gërmuar në tokën e tij. Ai nuk po bën asnjë ndërtim. Ne kërkojmë drejtësi se vetëm ne na pengojnë”, u shpreh ai.
Sakaq, kujtojmë se për këtë ngjarje policia ka shpallur procedim penal për katër punonjës të IMT Fier, të cilët akuzohen për shpërdorim detyre, pasi nuk penguan gërryerjen e dherave dhe ndërtimin pa leje që po zhvilloheshin nga Sajmir Troka.
Discussion about this post