Zgjedhjet në Kosovë, pjesëmarrja në votime sipas KQZ-së

Në raundin e dytë të zgjedhjeve lokale në Kosovë, deri në orën 15:00 kanë votuar rreth 24% e votuesve. Sot më 14 nëntor, qytetarët e Kosovës po votojnë për të zgjedhur kryetarët e 21 komunave. Sipas kryetarit të KQZ-së, Kreshnik
Radoniqi, deri në këtë kohë nuk ka pasur incidente të rënda gjatë procesit zgjedhor.

“Nuk kemi pasur ndonjë parregullsi që do ta cenonte seriozisht procesin e votimit”, tha ai.

Komuna me më shumë votues deri tani është Mamusha e pas saj Juniku. Më pak votues janë regjistruar në Rahovec dhe Dragash.
Sipas KQZ-së, të drejtë vote në këtë rund zgjedhjesh kanë 1,260,571 qytetarë dhe ata do të mund të votojnë në 575 qendra votimi me 1,638 vendvotime.

Votimet për raundin e dytë do të mbyllen në orën 19:00. Komunat në të cilat po zhvillohet rundi i dytë i zgjedhjeve lokale janë: Gjakova, Gllogovi, Gjilani, Dragashi, Istogu, Kaçaniku, Klina, Fushë Kosova, Kamenica, Obiliqi, Rahoveci, Podujeva, Prishtina, Prizreni, Shtimja, Vitia, Vushtrria, Malisheva, Juniku, Mamusha dhe Kllokoti.