I dërguari i posaçëm i Bashkimit Evropian për dialogun mes Kosovës dhe Serbisë, Miroslav Lajçak, pritet të vizitojë sot Kosovën.
Zëdhënësi i Qeverisë, Përparim Kryeizu ka thënë për Telegrafin se Kurti dhe zv.kryeministri Bislimi do të kenë një drekë pune me Lajçak.
“Kryeministri Kurti bashkë me zëvendëskryeministrin Besnik Bislimi priten të zhvillojnë nesër një drekë pune me emisarin Lajçak”, tha Kryeziu.
Mësohet se ai pas Prishtinës, do të shkojë edhe në Beograd, ku do të zhvillojë takim edhe me presidentin serb, Aleksandar Vuçiç.
Vizitat e shpeshta të Lajçak në Kosovë dhe Serbi, kanë të bëjnë me rritjen e intensitetit të dialogut, konkretisht për avancimin rreth propozimit evropian për normalizimin e marrëdhënieve mes palëve, por edhe për zbatimin e të gjitha marrëveshjeve të arritura në kuadër të dialogut.
“U ktheva në Kosovë për t’i vazhduar diskutimet e mia të sinqerta, të hapura dhe intensive me kryeministrin Albin Kurti dhe zv.kryeministrin Bisnik Bislimin, për hapat e ardhshëm dhe rrugën përpara për normalizimin e marrëdhënieve me Serbinë. Ne gjithashtu u dakorduam që të gjitha marrëveshjet e kaluara të dialogut të zbatohen plotësisht”, shkruan Lajçak në Twitter.
Sa i përket Asociacionit, Kurti gjatë fillim shkurtit ka paraqitur 6 kushte për themelimin e AKS-së.
Ai tha se Asociacioni nuk mund të jetë njëetnik, ai duhet të jetë në përputhje me Kushtetutën dhe ligjet e vendit.
Po ashtu sipas tij, Asociacioni duhet të ketë një emër tjetër dhe të mos ketë kompetenca ekzekutive, të ketë të përfshirë parimin e reciprocitetit mes shteteve sa i përket të drejtave të pakicave kombëtare, bazuar në modelet evropiane.
Discussion about this post