Prej disa kohësh është ngritur çështja e kandidaturës së përbashkët të Greqisë, Arabisë Saudite dhe Egjiptit për organizimin e FIFA World Cup 2030 . Nënkryetari i PSAT-së pak muaj më parë deklaroi se princi i kurorës së Arabisë Saudite, Mohammed Bin Salman ka marrë “dritën jeshile” nga Kyriakos Mitsotakis dhe presidenti i Egjiptit, Abdel Fattah El Sisi, për të vazhduar me procedurat. Tani, “Politico” raporton se shteti saudit ka ofruar të paguajë për ndërtimin e stadiumeve të reja në Greqi dhe Egjipt nëse ata pranojnë të bashkëpunojnë për të pritur Kupën e Botës pas shtatë vitesh. Në këmbim, sipas “Politico”, sauditët do të merrnin 3/4 e të gjitha ndeshjeve. Mediat ndërkombëtare kontaktuan të gjitha palët për një koment me qeverinë greke dhe saudite që refuzuan të komentojnë mbi këtë çështje, siç bëri UEFA dhe FIFA.
Sipas “Politico”, duke cituar zyrtarë të lartë me njohuri për këtë çështje, oferta, që ka të ngjarë të vlejë miliarda euro në kostot e ndërtimit, u diskutua në një bisedë private midis Mohammed bin Salman dhe kryeministrit grek Kyriakos Mitsotakis në verën e vitit 2022. Një zyrtar i lartë me njohuri për diskutimet private i tha gjithashtu gazetës se Arabia Saudite është e përgatitur të mbulojë koston e plotë të pritjes së Greqisë dhe Egjiptit, por 75% e turneut masiv me 48 ekipe do të duhej të luhej në terrenin e saj. Vendi i Gjirit synon të “barazojë” Katarin, i cili priti Kupën e Botës FIFA në vitin 2022.
Përgjigja e Greqisë dhe Egjiptit ndaj këtij propozimi nuk shpjegohet në raportin e “Politico”, por është e sigurt që të tre vendet tani janë duke punuar për një propozim të përbashkët për organizimin e turneut 2030 . “Oferta e Riadit për Greqinë do të nxisë kritikat se Arabia Saudite në thelb po përpiqet të përdorë pasurinë e saj astronomike për të blerë Kupën e Botës duke ndërtuar një koalicion ndërkontinental dhe duke shfrytëzuar me zgjuarsi sistemin e votimit”, komenton “Politico”.
Në një përpjekje për të bindur anëtarët e FIFA-s për virtytet e propozimit të udhëhequr nga Arabia Saudite, turneu do të shohë ndeshje në tre kontinente, duke siguruar ekuilibër gjeografik. Një ofertë për Kupën e Botës vetëm për Lindjen e Mesme nuk ka gjasa të ketë sukses vetëm tetë vjet pasi Katari priti turneun në 2022. Kundërshtarët kryesorë të sauditëve janë një ofertë e përbashkët e Spanjës, Portugalisë dhe Ukrainës nga Evropa dhe një ofertë e Amerikës së Jugut të Argjentinës, Uruguait, Paraguait dhe Kilit. Vendimi se kush do të presë Kupën e Botës 2030 do të merret në një votim publik nga Kongresi i FIFA-s.
Pritja e Kupës së Botës do të ishte kulmi i strategjisë ambicioze të Arabisë Saudite për të dominuar ngjarjet kryesore sportive. Sukseset përfshijnë marrjen e të drejtave për të pritur ndeshjet e boksit të kampionatit botëror dhe garat e Formula 1, ndërsa ka krijuar edhe turneun e saj të golfit. Fondi i Investimeve Publike të Arabisë Saudite ka blerë gjithashtu një klub të njohur futbolli anglez dhe vendi do të presë Kupën e Azisë për herë të parë në vitin 2027. Megjithatë, perspektiva që Arabia Saudite të presë Kupën e Botës ka ngjallur reagime të forta nga grupet e të drejtave të njeriut, të cilët theksojnë ndaj trajtimit brutal të komunitetit LGBTQ+ dhe keqtrajtimit të punëtorëve migrantë në vend. Sigurisht që edhe femrat mbeten të diskriminuara, me gjithë hapat që janë hedhur në vitet e fundit.
Discussion about this post