Droga me thasë, ekspertiza: Kokainë e pastër, 485 kg

Ka dalë ekspertiza e drogës të kapur në thasë në banesën e Viktor Cervanakut.

Droga ka rezultuar se është kokainë e pastër, plot 485 kg. Viktor Cervanaku, ish-kryekomunar socialist e djali i tij Denilson Cervanaku akuzohen për trafik droge.

Kush është Viktor Cervanaku, lidhjet me PS-në

Viktor Cervanaku në shtëpinë e te cilit u zbulua një laborator për përpunimin e kokainës është një emër i njohur për opinionin publik , jo vetëm në Fier por edhe me gjerë.

Për shumë vite ai ka qenë kryetar i komunës Frakull të Fierit, nën siglën e Partisë Socialiste. Në vitin 2006 ai është kallëzuar penalisht nga Inspektorati i Deklarimit te Pasurive për “ refuzim për deklarim”, por shpëtoi nga ndjekja penale për shkak te një amnistie të miratuar nga Parlamenti në fund të atij viti.

Në vitin 2008 , Viktor Cervanaku ka qenë objektiv i një atentati te dështuar nga R. Kapaj. Ky i fundit ishte acaruar me kryekomunarin e Frakullës pasi nuk arrinte të merrte një certifikate referuar raportimeve mediatike të kohës.

Ndërkohë në vitin 2010 ai shoqërohet nga policia e Fierit nën dyshimet se qarkullonte me një automjet të trafikuar nga Greqia.

Në atë kohë Cervanaku udhëtonte me një Range Rover me targa të vendit fqinj. Në një reagim për mediat atë kohë, Cervanaku pranoi se ishte shoqëruar ne polici dhe kishte sqaruar çështjen e mjetit.

Viktor Cervanaku vijonte të ishte aktiv në politiken lokale te Fierit edhe pse pas vitit 2015 me shkrirjen e komunave nuk ishte më drejtues i njësisë vendore.

Sipas të dhënave të “ listës se pagave” të rrjedhura në publik vitin e kaluar rezultonte se Viktor Cervanaku ishte drejtor i Administratës tek Operatori i Sistemit te Transmetimit ndërsa se fundi punonte në sektorin e burimeve njerëzore.