Siç është zakon, çdo gjë e bukur e ka një fund. Kjo shprehje vlen edhe për futbollin sidomos trajnerët e skuadrave. Në Angli e bëjnë fakt pothuajse të kryer shkarkimin e trajnerit Jurgen Klopp, nëse “The Reds” do të eliminohen nga Reali i Madridit në 1/8 e Champions League.
“Besoj se Klopp do të largohet. Jo tani, por nëse Reali i Madridit e eliminon nga Liga e Kampionëve. Them se ai do të largohet para fillimit të sezonit të ardhshëm”, deklaroi gazetari Richard Keys.
“Liverpooli është larg. Ata janë hije e asaj që kanë qenë dikur dhe nuk është mirë të fajësohen pronarët. Rënia është përgjegjësi e Kloppit,” këmbënguli Keys, duke fajësuar gjermanin për krizën e rezultateve të ekipit.
Vendi i 10-të në kampionat, mundësia për t’u larguar shumë shpejt nga turneu kontinental dhe për të mbetur jashtë Evropës sezonin e ardhshëm, loja aspak bindëse dhe qëndrimi i ashpër ndaj shtypit janë arsyet që po e shtyjnë bordin e drejtorëve drejt shkarkimit të trajnerit.
“Ka vetëm një fitues kur një trajner lufton me shtypin, dhe ai nuk është trajneri,” tha Keys për luftën e trajnerit me shtypin.
Discussion about this post