Një tjetër episod negativ ka ndodhur në futbollin italian. Në një ndeshje të kampionatit të të rinjve, gjyqtarja kryesore, që e kishte ndërprerë përfundimisht takimin për shkak të një sherri masiv në fushë, u la e mbyllur e vetme në stadium.
Kjo i ka ndodhur një vajze në provincën e Brescias, me rastin e ndeshjes mes Darfo Boarios dhe Carpenedolo, e pezulluar në minutën e 26-të të pjesës së dytë, “për shkak të një “përleshjeje” ku u përfshinë pothuajse të gjithë lojtarët e pranishëm të të dyja ekipeve, si dhe drejtuesit e të dy klubeve”, siç shpjegohet në raport nga e njëjta gjyqtare.
“Ndërsa ajo u largua nga fusha – shkruhet në deklaratën e lëshuar si pjesë e masave disiplinore nga Komiteti Rajonal i Lombardisë – gjyqtarja u rrethua nga anëtarët e të dy klubeve, të cilët kundërshtuan vazhdimisht dhe me forcë vendimin për të pezulluar përfundimisht ndeshjen.
Ajo shkoi duke qarë në dhomën e zhveshjes së arbitrave, pa marrë përkujdesjen e askujt. Kur doli jashtë, nuk pa askënd dhe kuptoi se ishte braktisur dhe mbyllur brenda stadiumit. Të dyja skuadrat humbën ndeshjen në tavolinë dhe morën gjobë.
Darfo Boarion, klubi pritës, u gjobit edhe me 100 euro gjobë “për asistencë të papërshtatshme ndaj arbitrit në fund të ndeshjes”. Ky episod na kujton rastin, jo shumë komik, të gjyqtarit Gianluca Paparesta, në ndeshjen Reggina-Juventus në sezonin 2004-2005, kur pas përfundimit të takimit, drejtuesi i Zonjës së Vjetër, Lucciano Moggi e kyçi arbitrin në dhomat e zhveshjes.
Discussion about this post