Nisur nga protesta e fermerëve në Lushnje, lideri i opozitës, Lulzim Basha ka postuar një pjesë nga fjala e tij në Kuvend ku shpreh mbështetjen ndaj tyre dhe kritikon qeverinë për mungesën e financimit të këtij sektori.
Kreu demokrat shprehet se vendi ynë ka mbështetjen më të vogël në Ballkan për këtë sektor, ku nuk krahasohet as me Kosovën apo Maqedoninë e Veriut.
“Bujqësia, që jep gati 20% të prodhimit të brendshëm bruto, merr në këmbim mbështetjen më të ulët në krahasim me çdo vend tjetër të Ballkanit, të pa krahasueshëm me Republikën e Kosovës apo të Maqedonisë së Veriut. Dhe kjo padiskutim që i bën jo konkurruese produktet e fermerëve tanë”, shprehet kryedemokrati.
Sipas tij, përgjigja e vetme që qeveria po i jep kërkesave të tyre është dhuna policore, duke i detyruar ata të emigrojnë apo të hedhin produktet.
“I shkatërron ata, ndërkohë që fermerët dhe blegtorët kërkojnë mbështetje serioze, përgjigja e vetme që vjen është dhuna policore mbi ta. Është dhuna për të shuar zërin e tyre. Është dhuna për të shuar protestën e tyre të drejtë. Dhe tani që flasim, tani që flasim në këtë moment, fermerët janë në rrugë, janë në shesh për të drejtat e tyre, për mbijetesën e tyre dhe të familjeve të tyre, për të marrë atë që kolegët e tyre në Kosovë dhe në Maqedoninë e Veriut, nuk po shkoj më tej, e gëzojnë çdo ditë, por jo këtu në Shqipëri. E gëzojnë ata nga qeveri që mbështesin bujqësinë, që u shpërblejnë mundin dhe sakrificën me të cilën kontribuojnë në ekonomi. Por jo fermerët tanë. Brenga, dëshpërimi dhe zemërata e tyre janë të përligjura, sepse detyron të flakin djersën, produktet e tyre, detyrohen të emigrojnë, detyrohen të punojnë tokat e vendeve fqinjë, të vjelin produktet e vendeve fqinj, sepse paratë e taksave që ky dhe qeveria e tij shpërdorojnë, nuk shkojnë për ta“, tha Basha.
Ndër të tjera, Basha shprehet se buxheti i shtetit duhet të përdoret për të mbështetur prodhimin vendas, jo për të majmur edhe më shumë obortarrët e qeverisë, sipas tij të korruptuar.
Discussion about this post