Ndërkohë që në Republikën e Shqipërisë nuk ndodh asgjë, edhe pse konsiderohet nga disa si i pari dhe i vetmi narkoshtet në Evropë, që shërben si bazë për grupet kriminale që operojnë që nga Amerika Latine e deri në Evropë, skandali i mafias shqiptare po shkakton një tërmet në Ekuador.
Ministri i Agrikulturës në këtë shtet, Bernardo Manzano ka dhënë dorëheqjen një ditë më parë, pasi emri i tij kishte dalë në investigimin që e lidh presidentin e vendit, Guillermo Lasso me mafian shqiptare.
Shkurt, njerëzit e rrethit të ngushtë të presidentit janë të lidhur me mafian shqiptare. Bëhet fjalë për kunatin e presidentit, Danilo Carrera dhe mikun e tij, Ruben Cherrez. Ky i fundit shërbente edhe si rekrutues për postet e larta në qeveri. Në këtë rast, Ministri i Agrikulturës i kishte dërguar atij rezymenë për të marrë detyrën e lartë.
Mediat në Ekuador shkruajnë se emri i shqiptarit, me të cilin janë të lidhur Carrera dhe Cherrez është Dritan Gjika. Manzano, që kishte më pak se një vit në postin e ministrit, është zyrtari i pestë i lartë i kabinetit të Lasso që jep dorëheqjen. Mediat ekuadoriane shkruajnë se ky skandal ka potencialin për të rrëzuar presidentin Guillermo Lasso.
Në një investigim të publikuar të hënën nga gazeta ‘La Posta’, e cila citon burime të inteligjencës ekuadoriane, thuhet se presidenti i vendit ka lidhje me mafian shqiptare të trafikut të drogës. Thirrjet për shkarkimin dhe ngritjen e akuzave ndaj presidentit janë duke u shtuar në vend.
Discussion about this post