Edhe pse temperaturat kanë qenë të larta këto kohë, rastet e pacientëve me viroza vijon të jenë të larta. Pneumologu Ardian Jorgji thotë për Gazetasi.al se tani mund të thuhet se jemi në pikun e gripit.
“Kemi fluks rastesh çdo ditë dhe nuk janë vetëm të moshuarit dhe fëmijët por edhe të rinjtë. Kemi shumë raste të rinjsh me grip”, thotë Jorgji i cili shton se fluksi vazhdon pavarësisht temperaturave që mund të jenë në favor të qytetarëve për të mos u prekur nga virozat që janë karakteristike e dimrit dhe temperaturave të ulëta.
Jorgji tregon se muaj më parë është parashikuar se në muajt Janar-Shkurt-Mars do të ketë fluks rastesh me viroza pasi janë vetë stinët që favorizojnë përhapjen e infeksioneve por gjithsesi pritej një ulje rastesh pikërisht për shkak të temperaturave që shumë herë kanë qenë të larta për stinën.
“Gripi vazhdon të qarkullojë akoma shumë sepse tashmë janë njerëzit që nuk po kujdesen për veten apo edhe për të tjerët. “Kemi grumbullime kudo dhe askush nuk përdor më maskë, edhe sikur të jetë afër me dikë që ka simptoma gripi”, thotë Jorgji duke shtuar se në mars pritet që të ketë kaluar vala e madhe dhe të ketë më pak raste.
Ndërkohë, mjeku shqiptar në Londër, Laidon Shapo thotë për Gazetasi.al se numri i shtuar i rasteve me grip dhe viroza të tjera në dimër është e lidhur me temperaturat e ulëta dhe rënien e imunitetit në hundë (pasi është vetë ajri i ftohtë që dëmton qelizat që luftojnë viruset) por dhe në organizëm për arsye të tjera si stres i vazhdueshëm, kequshqyerje, inaktivitet fizik, infeksione të mëparshme përfshi Covid-19, etj).
Shapo thotë se pavarësisht faktit se temperaturat e ulëta ndikojnë direkt në hundë dhe më gjerë, infeksionet përhapen gjithashtu edhe në temperatura të mira kur gjejnë një terren të përshtatshëm ku variantet e Covid-19 kanë mbijetuar apo edhe viruse të tjera, çka kanë krijuar një imunitet të ulët tek pacientët.
“Gjithashtu, koha e mirë ndihmon në shtimin e grumbullimeve dhe afërsinë e njerëzve me njëri-tjetrin”, thotë Shapo duke shtuar se ka shumë aktivitete për shkak të kohës së mirë, si në natyrë, në ambiente të mbyllura apo edhe në shkollë mes fëmijëve. Të gjitha këto kontribuojnë që viruset të vazhdojnë të jenë në qarkullim./GazetaSi
Discussion about this post