Dje një aksident trafiku ka ndodhur në rrugën Shtime-Ferizaj, ku të vdekur mbetën katër persona, derisa dy të tjerë u dërguan në Emergjencë për shkak të lëndimeve të marra. Njëri nga të mbijetuarit tashmë është duke u trajtuar në Klinikën Intensive në QKUK. Bëhet fjalë për një grua 27-vjeçare, që është shtatzënë në javën e 22-të. Për gjendjen e saj ka folur Shefi i Klinikës së Ndërhyrjeve Intensive, Shaqir Uka.
Doktor Uka tha se gruaja ka marrë lëndime në pjesë të ndryshme të trupit, ndërsa foshnja është e mirë.
“Te Mjekimi Intensiv Qendror ka ardhur vetëm një prej të mbijetuarve. Është një paciente femër 27-vjeçare, shtatzënë prej 22 javësh. Ajo ka lëndime traumatike në pjesën kokës më të lehta, në gjoks, në ekstremitetet e sipërme dhe të poshtme, lëndime të rënda, serioze, të cilat para ekzaminimit dhe trajtimit në qendrën emergjente vazhdojnë të monitorohen në repartin Intensiv. Foshnja për momentin është mirë, sipas ekzaminimeve nga gjinekologu, është mirë”, u shpreh ai.
Lidhur me aksidentin tragjik, ka njoftuar edhe sot Policia e Kosovës përmes raportit 24-orësh.
“Ka ndodhur aksident trafiku në mes të tri veturave me targa vendore, aksidenti dyshohet se ka ndodhur kur drejtuesi i njërës nga veturat për arsye deri më tani të pa njohura, humb kontrollin e veturës dhe godet dy automjetet e tjera të cilat ishin duke lëvizur në drejtim të kundërt. Nga ekipi mjekësor në vendin e ngjarjes është konstatuar se tre viktima meshkuj kosovarë janë pa shenja jete, ndërsa tre të lënduar tjerë janë dërguar në emergjencën e Ferizajt, ku më pas ka ndërruar jetë edhe viktima e katërt mashkull kosovar ndërsa dy të lënduarit e tjerë janë dërguar në QKUK Prishtinë për tretman të mëtutjeshëm mjekësor. Në vendin e ngjarjes ka dalë edhe prokurori i shtetit”, thuhet në raportin e sotëm të policisë.
Për viktimat e aksidentit ka folur edhe kryetari i komunës së Ferizajt, Agim Aliu mbrëmë. Ai tha se dy prej viktimave janë nga fshati Dremjak i Ferizajt, ndërsa dy nga komuna e Shtimes.
“Pa fjalë, të tronditur nga aksidenti i sotëm në magjistralen Ferizaj-Shtime, ku humbën jetën 4 bashkëqytetarë, dy prej tyre nga fshati Dremjak i Ferizajt e dy nga Komuna e Shtimes, në mesin e tyre edhe një punonjës i Drejtorisë së Bujqësisë në Komunën e Ferizajt”.
Discussion about this post