Pas protestë së djeshme në Lushnje, në kur në Kuvend fliste kryeministri Edi Rama, sot fermerët kanë përgënjeshtruar çdo gjë të thënë nga ai. Dje nga foltorja e Parlamentit, Rama tha se7.1 miliardë lekë janë vendosur në dispozicion të buxhetit të shtetit si mbështetje. Teksa pohoi se ka një rritje të konsiderueshme në fushën e eksporteve në Bujqësi, kryeministri theksoi gjithashtu se krahasimisht me vitin 2013 sasia e tokës së punuar në Shqipëri është 2 herë më e madhe. Por këto të dhëna të deklaruara nga Rama janë hedhur krejtësisht poshtë nga fermerët.
Përmes një letre drejtuar qeverisë Sindikata e Fermerëve shprehet se ata janë krejtësisht kundër paketës fiskale, duke theksuar se ata ndodhen në një gjendje larg pritshmërive dhe në krizë të thellë. Sipas tyre, paketa fiskale nuk do i ndihmojë bizneset, ashtu sikur pretendon qeveria, por do i rrënojë ata më shumë. “Situata aktuale në të cilët ndodhet bujqësia, por edhe të gjitha hallkat e zinxhirit të ekonomisë së ushqimit nuk po na rezulton në nivelin e pritshmërive. Pjesa më e madhe e operatorëve parashikojnë ta mbyllin vitin 2021 me rezultate jo të mira krahasuar me sektorët e tjerë. Gjithashtu krahasuar me planet e tyre të biznesit, me potencialet dhe mundësitë reale që ekzistojnë. Konstatojmë me keqardhje se edhe Paketa Fiskale dhe P/Buxheti vitit 2022 nuk do të garantojnë frenimin e rënies ne disa sektorë, si p.sh. tek Akuakultura, Blegtoria, Tregjet Agro Blegtorale, Agropërpunimi, Agroturizmi, Agropylltaria dhe Mjedisi ne zonat rurale. Gjithashtu nuk do të garantojë as qëndrueshmërinë dhe rritjen në disa sektorë të tjerë, që kanë performuar më mire se Frutat, Perimet, Peshkimi, Agrobiznesi, Bimët Mjekësorë dhe Aromatike, Bletaria si dhe Mikrofinanca”, thuhet në letër.
Sakaq, ata theksojnë se tokat e prodhimit nuk janë rritur aq sa deklaron kryeministri, përkundrazi të mbjellat kanë rënë me 30%. Ndërsa theksohet se, ata përfitojnë vetëm 2% të buxhetit në total, duke e konsideruar këtë vlerë si një lëmoshë. “Në gjykimin tonë, disa tregues do të jenë edhe më negative në vitin 2022, pasi vërejmë 30% me pak mbjellje dhe rritje galopante të kostove të prodhimit, si pasojë e krizës globale të rritjes së çmimeve. Nuk është e drejtë që sektori ynë që kontribuon me 20% të PBB dhe ku janë të punësuar 40% e forcës së aftë për punë, të përfitojë vetëm 2% të shpenzimeve të buxhetit”, thuhet në letër. Sakaq, ata i kërkojnë qeverisë që të rishikohet në rritje për vitin 2022 projektbuxhetit për MBZHR dhe projekti për Paketën e re Fiskale të pezullohet deri në përfundim të vlerësimit të situatës, të studimeve dhe konsultimit me grupet e interesit.
Discussion about this post