Deputeti i Partisë Demokratike, Ervin Salianji deklaron se Edi Rama do të shpallet non grata nga SHBA, për skandalin “McGonigal”.
Në emisionin “Task Force”, Salianji tha se kryeministri duhet të hetohet dhe të mbajë përgjegjësi penale për korruptimin e zyrtarit të FBI.
“Qytetarët e dinin që zoti Berisha ishte non grata dhe pati një votë masive. Në 6 mars zgjodhën që PD, opozita në Shqipëri të drejtohej në këtë drejtim. Cilido që në çdo garë të brendshme partiake, primaret, si kudo, pasi bëhen, pavarësisht qëndrimeve të ndryshme që kanë palët, në fund ai që është fitues i bashkohen të tjerët. Nuk po kërkojmë që Rama të shpallet vetëm non grata, por po kërkojmë shumë më shumë se kaq. Edi Rama kontrollon çdo institucion dhe është një autokrat lokal dhe i vockël. Rama ka tentuar nëpërmjet mediave që të pompojë idenë që është i përzgjedhur i Amerikanëve. Me aferën “McGonigal” edhe kjo ra dhe na vuri në dyshim edhe ne të tjerët në pacenueshmërinë e verdiktit të tyre”, tha deputeti.
Më tej, shtoi:
“Nëse Rama do të ishte i preferuar i SHBA nuk do të detyronte të sillte një njeri të zhgërryhej nëpër Shqipëri dhe Tropojë si McGonigal. Edi Rama jo vetëm që duhet të shpallet non grata dhe mund ta ketë, këtu do jemi, por duhet të hetohet dhe të mbajë përgjegjësi penale sepse ka sjellë kosto që për vendin kanë patur efekte shkatërrimtare, ka dëmtuar opozitën, ka kapur institucionet, ka prishur një balancë.
Fakti që një kryeministër bizantin shqiptar përdor të gjitha pushtet që rrjedhin nga të qenit kryeministër, të gjitha burimet natyrore, financiare, për të thyer sistemin e SHBA dhe për të kapur drejtuesin e kundërzbulimit dhe për ta përdorur për interesa të veta politike, sipas aktakuzës së zyrës së Prokurorit të Distriktit të Kolumbias dhe sipas mediave prestigjioze amerikane, jemi në kushtet kur Edi Rama duhet të mbahet përgjegjës sipas ligjit. E vetmja gjë që e mban Ramën që të mos ketë hetim në SHBA, është imuniteti si kryeministër. Ne po themi që ky imunitet në Shqipëri nuk e pengon SPAK-un që të nisë hetimet kryesisht siç ka nisur për cilido këtu”.
Discussion about this post