Rreth 3300 qytetarë janë dënuar në 5 vite të fundit për ndërtime pa leje referuar të dhënave të Prokurorisë. Drejtësia dhe shteti ka vepruar me ‘dorë të hekurt’ përballë ndërtimeve të bëra nga qytetarët qofshin këto edhe meremetimie apo rrethime shtëpie. Me dhjetra qytetarë kanë humbur banesat e tyre me pretendimin se janë ndërtuar pa leje, madje ka pasur raste ku nuk ka munguar as dhuna mes qytetarëve dhe inspektorëve të IKMT-së.
Në shtator të vitit të kaluar 82- vjeçarja Lefkothia Karasa nga Vlora u shoqërua në polici për ndërtim pa leje kur në fakt po ndërtonte një kotec.
Teksa shteti shikonte me vëmendje çdo shkelje të qytetarëve, kishte harruar të kthente gjykimin nga vetja.
30 vite shteti ndertoi pa leje!
Më 23 janar të këtij viti kreu i Kadastrës Shqiptare Artan Lame u shpreh se vetë shteti shqiptar në këto 30 vite ka ndërtuar pa leje dhe tashmë ka ardhur koha që edhe këto godina të legalizohen dhe të regjistrohen si prona shtetërore.
Shkeljet më të mëdha tha Lame janë identifikuar me pronat e Ministrisë së Brendshme, ministrisë së Shëndetësisë dhe asaj të Arsimit, ku pronat e tyre janë tjetërsuar.
Por a ka të ndëshkuar për shkeljet e shtetit? A mban përgjegjësi njeri për mos regjistrimin e pronës?
Edhe pse nuk është vënë askush përpara përgjegjësisë për këto shkelje ndryshe nga sa ka ndodhur me qytetarët që burgosën, Lame bëri se prona shtetërore është dëmtuar në mënyrë të jashtëzakonshme ndër vite.
Ne një kohë kur kryeministri kujdeset të kërcënojë me burg e gjoba qytetarët që ndërtojnë pa leje (pasi nuk arrijnë të paguajnë tarifat dhe nuk kapërcejnë burokracitë dhe zvarritjet për të marrë leje ndertimi), nuk flet për shkeljet e kabinetit të tij.
Absurdi është i pajustifikuar në kushtet kur rezulton e paregjistruar Presidenca, Kryeministria, Kuvendi etj.
Prona shtetërore është uzurpuar!
“Prona është plaçkitur”, theksoi Lame. Por plaçkitja nuk pritet të ndalet edhe për disa vite përsa kohë në Kadastër janë regjistruar me pak se 10% e pronave shtetërore. Nga 260 mijë pasuri shtetërore, në Kadastër janë regjistruar vetëm 20 mijë prej tyre.
Pronat shtetërore në shumicën e rasteve janë zënë nga qytetarët, janë kthyer në biznese, mbi to janë bërë ndërtime. Vetëm si pasojë e keqmenaxhimit shteteror pronat janë lënë në mëshirë të fatit. Me dhjetëra godina ushtrie janë kthyer në banesa, e janë tjetërsuar. Rasti flagrant është ai i portit të Shëngjinit i cili është i zënë nga privati.
Pavarësisht kryerjes së regjistrimit të këtyre pronave, shteti përsëri humbet pasi nuk do të mund të marrë pronat e veta që tashmë janë me pronarë provat, pra të gjitha pronat që janë fituar nga privati me vendime gjykate nuk mund t’i kalojnë shteti. Procedurë që e njeh edhe ligji.
Edhe pse gjithmonë gishti është drejtuar nga qytetarët për shkelje të caktuara, në fenomenin “prona”, duket se shteti ka bërë gjemen.
Në ligjin 20/2020 “Për përfundimin e proceseve kalimtare të pronësisë në Republikën e Shqipërisë”, institucioneve shtetërore dhe pushtet vendor ju la afat 2 muaj për të ngritur një strukturë për të ndjekur procedurat deri në regjistrimin e pronave por që në fakt procesi mbetet në vend-numero.
“Institucionet shtetërore dhe njësitë e vetëqeverisjes vendore kanë detyrimin që, brenda 60 ditëve nga hyrja në fuqi e këtij ligji, të krijojnë ose të ngarkojnë një strukturë të posaçme, e cila ka për objekt të veprimtarisë së saj vetëm inventarizimin, plotësimin, përditësimin dhe ndjekjen e procesit deri në regjistrimin e pronave në regjistrin publik të pasurive të paluajtshme dhe pajisjen me certifikatë pronësie, për çdo pasuri”, thuhet në pikën 2 të nenit 44 të ligjit të sipërcituar.
Pse nuk kryhet regjistrimi i pronave?
Të njëjtin problem si institucionet shtetërore e kanë edhe bashkitë të cilat kanë gjithashtu me mijëra prona te pa regjistruara, dhe si shkak kryesor evidentohet tarifa e lartë që duhet paguar pranë kadastrës për të regjistruar pronat.
Në Nenin 43 të ligjit 20/2020, thuhet se për të regjistruar pronat duhet paguar.
“1. Për regjistrimin fillestar të pronave të institucioneve shtetërore dhe të njësive të vetëqeverisjes vendore aplikohen tarifa shërbimi të reduktuara, sipas parashikimeve të legjislacionit në fuqi për kadastrën.
- Për pronat e regjistruara përpara hyrjes në fuqi të këtij ligji, institucionet shtetërore dhe njësitë e vetëqeverisjes vendore nuk paguajnë tarifë regjistrimi për ndryshimet që do të rezultojnë në regjistrin e pasurive prej përditësimit, sipas këtij kreu”, thuhet në nenin 43 të ligjit.
Mungesa e regjistrimit të pronave dhe mos marrja e certifikates së pronësisë i privon institucionet edhe nga shfrytëzimi i tyre apo qoftë edhe nga nxjerrja e fitimeve, pasi ata nuk mund t’i japin më qira e të administrojnë të ardhurat.
Nga ana tjetër këto prona mund të përdoren edhe për veprimtari të paligjshme përsa kohë shteti i ka lënë ‘pa pronar’.
Lexo edhe: Ndërtimet pa leje në Vlorë, tre persona vihen në pranga
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post