Sekretari Amerikan i Shtetit, Antony J. Blinken i ka dërguar një letër falënderimi ministres për Evropën dhe Punët e Jashtme, Olta Xhaçka ku shpreh mirënjohje për kontributin e dhënë nga ushtarët shqiptarët gjatë aksioneve të NATO-së në Afganistan.
Në letrën e tij, Blinken ka falenderuar Shqipërinë për ndihmën e dhënë në pritjen e refugjatëve afganë të cilët prej muajsh tashmë janë akomoduar në vendin tonë, pasi u larguan nga regjimi taleban.
“Në emër të Departamentit të Shtetit, dëshiroj t’i shpreh mirënjohjen tonë më të thellë Republikës së Shqipërisë që ishte vendi i parë që ofroi një “parajsë të sigurtë” për afganët e rrezikuar dhe për zemërgjerësinë e kurajon që kanë treguar njerëzit tuaj gjatë operacioneve të NATO-s në Afganistan. Në mënyrë të veçantë dëshiroj t’ju përgëzoj Juve për ndërhyrjen e fuqishme në Ministerialin e datës 20 gusht të takimit virtual të Ministrave të Jashtëm”, shkruhet në letër.
Ndër të tjera, në letër shkruhet se vendi ynë ka treguar përkushtim ndaj aleatëve të NATO-s duke kontribuar me kapacitete njerëzore dhe ushtarake.
“Shqipëria edhe një herë ka demonstruar përkushtimin e saj të fortë ndaj Aleancës së NATO-s duke kontribuar me kapacitete njerëzore dhe ushtarake për “Resolute Support Mission” në Afganistan, duke dislokuar më shumë se 4000 trupa ushtarake në Afganistan përgjatë operacioneve atje. Ju falenderoj për këto dislokime përkrah forcave tona dhe në veçanti për pesë dislokimet e përbashkëta me shtetin tuaj partner, Gardën Kombetare të New Jersey. Investimi i Shqipërisë në sigurinë dhe prosperitetin e popullit afgan ka ndihmuar shumë në avancimn e synimeve tona të përbashkëta”, shkruhet ndër të tjera.
Në përfundim të letrës, Blinken shprehet se vlerëson marrëdhënien me Shqipërinë dhe vazhdimin e këtij partneriteti për avancimin e interesave të përbashkëta.
Discussion about this post