Deputetja më e moshuar e Parlamentit shqiptar, Luljeta Bozo ka diskutuar sot në lidhje me buxhetin 2022. Gjatë fjalës së Bozo për pak “harroi” se është në radhët e mazhorancës, duke mos kursyer kritikat për projektbuxhetin. Ajo renditi si problematikën kryesore fondin e ulët që qeveria ka akorduar vitin që vjen për indeksimin e pensioneve. Bozo tha se duhet të rriten patjetër pensionet dhe se fondi në dispozicion është i pamjaftueshëm. “Problemi i dytë që dua të trajtoj është në fushën sociale që janë pensionistët. Në këtë buxhet janë parashikuar dy masa për ta, indeksimi i pensionit sipas masës së inflacionit dhe bonusi i vitit të ri. Nuk është e mjaftueshme. Një pjesë e madhe e pensionistëve marrin një pension qesharak. Këtë gjendje mund ta përmirësojmë si më poshtë. Të rishikohet legjislacioni për pensionistët përpara ndërmarrjes së reformës së pensioneve. Nga një grup ekspertësh të përcaktohet sa është minimumi jetik dhe për pasojë pensioni minimal të mos jetë më i vogël se kaq, u shpreh ajo.
Sipas saj, situata me pensionet është shumë alarmante, pasi një numër i madh pensionistësh paguhen më pakë se 20 mijë lekë. “Së treti, në numrin total të pensionistëve, Instituti i Sigurimeve Shoqërore të na raportojë se sa pensionistë e kanë pensionin më të vogël se 20 mijë lekë. Nëse kjo shifër është e madhe do të thotë se situata e pensioneve është serioze. Mendoj se shërbimi shëndetësor falas, pavarësisht se mendoj se në sistem është futur, për pensionistët duhet kontrolluar nëse është i tillë për analiza dhe konsulta pasi nuk është kështu në praktikë. Pensionistët duhet të marrin të gjithë ilaçet e rimbursueshme ose të shtohet kjo listë”, u shpreh ajo, duke kërkuar që të shtohet numri i qendrave sociale, jo azile ku mund të punojnë të rinjtë.
Discussion about this post