Gjykata e Lartë ka rrëzuar kërkesën e Fatos Skejës, ish oficer i Gardës së Republikës në grupin që shoqëronte Berishën, vendim i zbardhur sot. Skeja ishte pëmendur nga i vëllai i Hekuran Dedjas, Hilmi Dedja se kishte shkuar në familjen e tyre, pas vrasjes së vëllait për të blerë heshtjen e tyre dhe për të ofruar para.
“Më 23 janar 2011, në orën 11:30 të natës, na erdhi në shtëpi, piu edhe kafe. La edhe një 10 mijë lekësh. Pasi doli në rrugë kërkoi të bisedonte me mua dhe me vëllain e madh. Ishte dhe vëllai i vogël aty. Na premtoi një shumë lekësh: ‘Prisni Berishën. Pranoni Kryeministrin, pasi keni një shumë parash, që i kam mbajtur në valixhe dhe do ju tregoj fotografinë e atij që ka qëlluar mbi Hekuranin”, ka deklaruar Hilmi Dedja.
Pas kësaj deklarate Fatos Skeja bëri padi në Gjykatën e Tiranës ku kërkonte përgënjeshtrimin dhe një dëmshpërblim prej 2 milionë lekësh.
Gjykata i dha të drejtë, por më pas Apeli rrëzoi vendimin, së fundmi edhe Gjykata e Lartë la në fuqi vendimin e Apelit duke mos i dhënë të drejtë Fatos Skejës e duke mos rrëzuar kështu as deklaratën e Hilmi Dedjas se oficeri i Gardës i ofroi para të priste Berishën në shkëmbim të fotos së vrasësit të të vëllait.
Pjesë nga vendimi i Gjykatës së Lartë
- Vlerësimi i Kolegjit Civil të Gjykatës së Lartë
- Në Gjykatën e Lartë në datë 11.04.2014 është regjistruar çështja nr. 11118-01285-00-2014 regj. them, që iu përket palëve: paditës Fatos Skeja dhe te paditur Hilmi Deda, me objekt: “Detyrimin e të paditurit të më shpërblejë për dëmin e shkaktuar në shumën 2.000.000 lekë. Detyrimin e të paditurit të publikojë një përgënjeshtrim të intervistës së dhënë në Vizion Plus, në këtë televizion dhe në tre nga gazetat me shpërndarjen më të madhe në vend”.
- Kolegji Civil i Gjykatës së Lartë (në vijim Kolegji) vlerëson se, rekurset e paraqitura nga pala paditëse Fatos Skeja, nuk përmbajnë asnjërin nga rastet e parashikuara në ligj, prandaj si i tillë ato nuk duhet të pranohen.
- Nga shqyrtimi i çështjes në dhomën e këshillimit rezulton se, rekurset e paraqitura nga pala paditëse Fatos Skeja, janë bërë për shkaqe të ndryshme nga ato që parashikohen në nenin 472 të Kodit të Procedurës Civile, pasi gjykatat më të ulëta e kanë respektuar ligjin material, duke e interpretuar dhe zbatuar drejtë atë. Vendimet e tyre nuk janë në kundërshtim me ndonjë vendim të Kolegjit Civil të Gjykatës së Lartë, ose të Kolegjeve të Bashkuara të Gjykatës së Lartë.
- Në përfundim të shqyrtimit të çështjes në dhomën e këshillimit, Kolegji arrin në konkluzionin se, rekurset e paraqitura nga pala paditëse Fatos Skeja janë të pabazuar në ligj, prandaj si rrjedhojë ato nuk duhet të pranohen.
PËR KËTO ARSYE,
Kolegji Civil i Gjykatës së Lartë, mbështetur në nenin 480 të Kodit të Procedurës Civile.
V E N D O S I:
Mospranimin e rekursit të paraqitur nga pala paditëse Fatos Skeja, ndaj vendimit nr. 335, datë 11.02.2014 të Gjykatës së Apelit Tiranë.
Tiranë, më 08.11.2022
Discussion about this post