Projekti “Veliera” pritet të shtyhet edhe 1 vit, ndërsa shkak është bërë anulimi i tenderit nga Bashkia e Durrësit.
Prej 4 vitesh ndërtimet në kuadër të këtij projekti kanë vijuar ndërsa tashmë, “Veliera” do të ngelet “një katrahurë”, me gjithë investimet që janë bërë gjatë kësaj periudhe.
Deri në fazën e katërt të punimeve janë shpenzuar 248 milionë lekë të reja ose rreth 2.5 miliardë lekë të vjetër dhe fondi do të përdorej për mbulesën përfundimtare të tendës, pra për realizimin e veshjes së sipërme të strukturës.
Në dosjen e tenderit, thuhet se bashkia e ka anuluar atë për arsye se “dokumentet e tenderit përmbajnë gabime ose mangësi të rëndësishme”.
Nuk dihet se cilat janë gabimet apo mangësitë e rëndësishme në dokumentet e tenderit, pasi ato nuk specifikohen në njoftimin e bashkisë.
Kujtojmë se ky projekt fillimisht nuk është mbështetur dhe përreth një vit punimet u ndërprenë, sepse Shoqëria Civile paditi në gjykatë disa institucione qendrore dhe vendore, ndërsa kundërshtonte ngritjen e kësaj vepre sipër zbulimeve arkeologjike dhe historike që dolën në pah gjatë gërmimeve.
Fondi në fjalë u akordua kur qyteti bregdetar kaloi lëkundjet sizmike e datës 26 nëntor 2019, që shkaktoi dëme kolosale në Durrës.
Ndërsa tashmë nuk dihet sesa do të jetë investimi real dhe përfundimtar në këtë projekt për shkak të ndërprerjes së punimeve me një vit. Gjatë kësaj kohe terreni ku janë duke u kryer punimet do të ngelet një “mal” me gërmalla duke i dhënë qytetit një pamje aspak të këndshme.
Discussion about this post