Policia e Kuçovës ka njoftuar se ka arrestuar 22-vjeçarin Bjorsi Shushari, i cili është protagonist i ngjarjes së ndodhur pas mesnatës së 25 shkurtit, ku dhunoi 54-vjeçarin Lefter (Krenar) Brisku, pasi e kapi në flagrancë duke vjedhur disa pula nga koteci i banesës së tij. Ky i fundit gjeti vdekjen sot në spital.
Ngjarja ka ndodhur në një banesë 2-katëshe në lagjen “11 Janari” të qytetit të Kuçovës, dhe i riu fillimisht u procedua në gjendje të lirë për dhunimin e hajduti, i cili në gjendje të dehur tentoi të largohej me një thes me pula të grabitur.
Por, paraditen e sotme Lefter Brisku ndërroi jetë në spitalin e “Traumës”, ku prej 1 jave gjendej në gjendje kome pas frakturave të rënda në kokë që pësoi pasi u godit nga 22-vjeçari.
Edhe pse vetë familja Shushari njoftoi policinë dhe ambulancën menjëherë pas ngjarjes dhe transportimi i 54-vjeçarit për në spital u bë në kohë, ai nuk mund t’ia hedhë paq nga plagët e marra.
Akuza
“Specialistët e Seksionit për Hetimin e Krimeve në Komisariatin e Policisë Kuçovë, bënë ndalimin e shtetasit B.Sh, 22 vjeç, banues në Kuçovë. Në datën 26.02.2023, gjatë natës në banesën e tij është futur për të vjedhur, shtetasi L.B, i cili u konstatua nga pronari i shtëpisë, shtetasi B.Sh, me të cilin më pas u konfliktuan. Gjatë konfliktit mbeti i dëmtuar shtetasi L.B, i cili ndodhej në spital për ndihmë mjeksore, por si pasojë e dëmtimeve të marra ndërroi jetë në spital sot më datë 04.03.2023”, njofton policia.
Bjorsi Shushari, i cili sipas fqinjve është student në Tiranë dhe fundjavën e shkuar gjendej pranë familjes në Kuçovë tashmë akuzohet për veprën penale “Vrasja e kryer me kapërcim të kufijve të mbrojtjes së nevojshme“.
Ndërkohë, familja Brisku në lagjen “11 Janari” në Kuçovë ka hapur pasditen e sotme dyert e mortit, në pritje të trupit të viktimës.
Familjarët e viktimës kërkojnë drejtësi dhe shprehen se 52-vjeçari u masakrua në mënyrë barbare nga i riu për dy pula.
Vëllai i viktimës, Shyqo Brisku ka folur për mediat dhe i ka bërë apel shtetit të vërë para drejtësisë 22-vjeçarin. Sipas tij, kishte edhe mënyra të tjera për ta neutralizuar atë gjatë grabitjes dhe më pas për të njoftuar policinë, por Shushari e ka dhunuar barbarisht.
“Nëse vëllai kishte shkuar për të vjedhur ata duhet të njoftonin policinë kur e panë në oborr dhe jo ta masakronin për vdekje. Vëllai im ka dalë atë natë nga shtëpia i dehur dhe në atë gjendje që ndodhej ishte shumë e thjeshtë që një 20-vjeçar ta neutralizonte e të thërriste policinë por jo ta masakronte për vdekje. Lajmin e morëm vesh nga mediat sepse policia nuk na njoftoi, as në Spitalin Ushtarak se pamë dot derisa vdiq, vetëm nusja mundi të hyjë brenda, por vëllai nuk reagoi asnjëherë. Ne kërkojmë drejtësi për vëllain tonë, që la jetim djalin e vetëm 16-vjeç”, është shprehur vëllai i 52-vjeçarit.
Discussion about this post