Rikandidimi i Biden nuk mbështetet unanimisht nga partia e tij

Steve Shurtleff ishte në anën e Joe Bidenit më 2019, kur ai i kishte paraqitur dokumentet në Dhomën Shtetërore në New Hampshire për të garuar për president.

Vazhdimisht kishte udhëtuar nëpër këtë shtet me Bidenin për të tërhequr votues në fazën fillestare të zgjedhjeve. Kur Bideni përfundimisht u bë president, ishte Shurtleff-i, atëherë kryetar i Dhomës Shtetërore të Përfaqësuesve, i cili me krenari e kishte vulosur zarfin ku ndodheshin katër votat zgjedhore të New Hampshire-it – përfshirë vetë emrin e tij – për t’u dërguar në Senatin e ShBA-së.

Megjithatë, kur po afrohet periudha e re e zgjedhjeve, Shurtleff-i, si shumica e demokratëve në pjesë të ndryshme të vendit, mendojnë se një mandat është i mjaftueshëm, raporton agjencia “Associated Press”.

“Në zemrën e zemrave të mia, jo”- tha Shurtleff-i, kur u pyet nëse dëshiron që Bideni të garojë përsëri. “Mendoj se shumë njerëz vetëm nuk dëshirojnë që ta thonë këtë”- shtoi ai

Vetëm 37 për qind e demokratëve në nivel vendi duan që presidenti të garojë për mandatin e dytë, sipas një ankete të publikuar muajin e kaluar nga agjencia “Associated Press” dhe Qendra NORC për Hulumtimin e Çështjeve Publike. Përkrahja për këtë gjë ishte 52 për qind disa javë para zgjedhjeve të mesit të mandatit vitin e kaluar.

Shumë janë të brengosur për moshën e Bidenit. Disa të tjerë, si Shurleff-i, janë të zemëruar për tërheqjen kaotike nga Afganistani. E krahu progresist i partisë asnjëherë nuk ka qenë i ngazëlluar me Bidenin, i cili perceptohet si i moderuar, pavarësisht nga lista e gjatë e të arriturave.

Bideni numëron disa të arritura domethënëse që do të mund t’ia fuqizonin fushatën. Ai ka nënshkruar një ligj për rimëkëmbje nga pandemia, një pako masive infrastrukturore, ligjin e parë federal për sigurinë e armëve në dekadat e fundit dhe një plan gjithëpërfshirës shëndetësor e mjedisor, i cili e ka lejuar uljen e çmimeve të ilaçeve.

Shtimi i vendeve të punës e shkalla e papunësisë, gjithashtu, janë përmirësuar gjatë mandatit të tij.

Megjithatë, ai është duke u ballafaquar me disa sfida akute, të cilat lidhen me inflacionin, imigrimin e paligjshëm, krimin e çështjet e jashtme.