Një incident ka ndodhur mbrëmjen e djeshme në veri të Kosovës ku policia ka urdhëruar për ndalim një makinë. Por pasi personat në makinë nuk kanë respektuar urdhrin policor, punonjësi i policisë u detyrua të përdorë armën e zjarrit.
Por makina e tipit Audi përmes rrugëve ilegale ka kaluar kufirin dhe ka hyrë në Serbi. Policia e Kosovës ka njoftuar se ka ndaluar dy mjete tjera në atë vendndodhje dhe që dyshohet se ndërlidhen me rastin.
Një nga personat e ndaluar është edhe një biznesmen, i cili merret me ndërtim të banesave në veri. Ai është duke u marrë momentalisht në pyetje nga policia me dyshimin se ka lidhje me serbët që kanë ikur. I njëjti person mësohet se ka precedent penal.
Njoftimi i Policisë së Kosovës:
Prishtinë, 9 mars 2023 Më datë 9 mars 2023, rreth orës 19:20, përderisa njësia policore e Policisë së Kosovës ndodhej në pikë kontrolli në fshatin Banje në një rrugë ilegale, duke realizuar detyrat dhe autorizimet e saj ligjore në garantimin e sigurisë, aty ka ardhur/qarkulluar një automjet xhip i tipit audi. Zyrtarët policor në pikë kontrolli sipas procedurave kanë sinjalizuar automjetin me bateri që të ndaloj për kontroll rutinor, por personi i dyshuar (drejtuesi i automjetit) posa ka vërejtur zyrtarët policor të cilët e kanë sinjalizuar për ndalim, ka rritur shpejtësinë për të ikur nga ndalimi duke rrezikuar drejtpërdrejt jetën e zyrtarëve policor, përderisa njëri nga zyrtarët policor me qëllim të shmangies së rrezikut të drejtpërdrejt për jetën e tij dhe zyrtarëve tjerë policor është detyruar që të përdor armën e zjarrit.
Automjeti i dyshuar me shpejtësi është larguar nga vendi i ngjarjes përmes rrugëve ilegale, përderisa njësitet policore janë duke ndërmarr veprime operative dhe hetimore për identifikimin dhe arrestimin e personit/ve të dyshuar të përfshirë në këtë rast. Si vazhdimësi e hetimit gjatë realizimit të detyrave policore, njësitë relevante policore kanë ndaluar dy automjete tjera të cilat kanë ardhë në atë lokacion, e që dyshohet se mund të ndërlidhen me veturën e dyshuar, në te cilat vetura gjendeshin pesë persona, të cilët janë dërguar në stacion policor për intervistim dhe procedura të mëtejme në bashkëpunim dhe koordinim me organet e drejtësisë. Policia e Kosovës mbetet e përkushtuar në realizimin e detyrave dhe autorizimeve ligjore në parandalimin e veprave kriminale, ndërmarrjen e masave rigoroze ndaj secilit individ apo grup kriminal që cenon rendin, sigurinë apo rrezikon jetën e zyrtarëve policor që po punojnë natë e ditë për të garantuar sigurinë e qytetarëve tanë në tërë territorin e Republikës së Kosovës.
Discussion about this post