Në mosmarrëveshjen midis Suedisë dhe Finlandës për anëtarësimin e tyre në NATO, të dyja vendet kanë rifilluar diskutimet me Turqinë. Pas një pauze disajavore, negociatorët e vendeve u takuan në Bruksel. Ky informacion u konfirmua nga qarqet e aleancës ushtarake. Në takim mori pjesë edhe Sekretari i Përgjithshëm i NATO-s, Jens Stoltenberg.
Turqia dhe Hungaria janë kundër
Përballë luftës së agresionit të Rusisë kundër Ukrainës, Suedia dhe Finlanda vitin e kaluar hoqën dorë nga neutraliteti i tyre prej dekadash dhe kërkuan të bashkohen me NATO-n. Të dy vendet dëshirojnë të hyjnë së bashku dhe njëkohësisht në aleancën e mbrojtjes. Por ajo që quhet zgjerim në veri duhet të miratohet nga 30 vendet anëtare. Turqia dhe Hungaria refuzojnë deri tani. Hungaria pritet të japë aprovimin së shpejti.
Turqia e kritikon Suedinë se nuk vepron mjaftueshëm kundër njerëzve dhe grupeve që Turqia i konsideron terroriste. Ankaraja sulmon kryesisht Partinë e ndaluar të Punëtorëve të Kurdistanit (PKK), e cila është gjithashtu në listën e organizatave terroriste në Evropë. Vitin e kaluar, diskutimet u zhvilluan në disa raste midis të tria vendeve, për të bindur Turqinë që të pajtohej. Por Turqia më pas i pezulloi bisedimet pasi ekstremistët e krahut të djathtë dogjën një Kuran në Stokholm në janar. Rinisja e bisedimeve është konsideruar si sukses në dy vendet skandinave. Megjithatë, një përparim i shpejtë nuk pritet.
Suedia prezanton një projektligj më të ashpër për terrorizmin
Ndërkohë, Suedia ka paraqitur një projektligj më të ashpër për terrorizmin. Në të ardhmen, do të dënohet pjesëmarrja në një organizatë terroriste ose financimi i një pjesëmarrjeje të tillë. Shkelësit rrezikojnë disa vite burg, siç tregon projektligji. Kjo bëhet për të mbushur një boshllëk në ligj, u tha.
Parlamenti tani duhet ta votojë ligjin. Ndryshimet pritet të hyjnë në fuqi më 1 qershor. Fakti që projektligji vjen tani, megjithatë, shihet si sinjal në konfliktin e NATO-s me Turqinë.
Kryeministri suedez Ulf Kristersson e quajti ashpërsimin një hap shumë të rëndësishëm në respektimin e angazhimeve që Suedia mori në fund të qershorit në një marrëveshje me Turqinë dhe Finlandën. Kjo marrëveshje do të hapte rrugën për anëtarësimin në NATO – pa sukses deri tani./DW
Discussion about this post