Dy javë më parë ishte Roma që u rrëzua në shtëpinë e Cremoneses, sonte ishte radha e Interit për të pësuar një humbje turpëruese në fushën e një prej skuadrave më të dobëta të këtij sezoni në Serie A, duke vënë seriozisht në rrezik pjesëmarrjen në Champions League sezonin e ardhshëm.
Skuadra zikaltër regjistroi humbjen e tetë në kampionat dhe këtë e bëri në shtëpinë e Spezias ku për më tepër pati luksin për të shpërdoruar një penallti me Lautaron në pjesën e parë i cili u ndal nga Dragowski.
Ndeshja u bë më e luftuar në pjesën e dytë kur Maldini jr. ndëshkoi skuadrën rivale të zemrës së tij. Djali i Paolo Maldinit zhbllokoi ndeshjen por Interi barazoi me Lukakun nga pika e bardhë pasi ishte belgu që në 11-metërshin e dytë nuk e lejoi Lautaron të korrigjonte shënjestrën.
Gjithsesi, avantazhi i zikaltërve zgjati vetëm 4 minuta sepse Dumffries shkaktoi një penallti në zonën e tij dhe Nzola nuk e fali Handanovic. 2-1 dhe ndeshja u mbyll në atë çast me Interin të dorëzuar që rrezikon të humbasë vendin e dytë në favor të Lazios pasi numëron 50 pikë, 2 më pak se bardhekaltërit dhe 3 më pak se Roma e Milan, ndërsa Spezia konsolidon pozitat në vendin e 17 me 24 pikë, 6 larg zonës së ftohtë por regjistron edhe fitoren e parë të historisë kundër Interit.
Discussion about this post