Operatori i Sistemit të Transmetimit zhytet në luks dhe rrit shpenzimet. Që nga fundi i vitit 2022 qytetarët shqiptarë vazhdojnë të paguajnë çmimin e energjisë shumë më të lartë se në rajon, edhe pse kemi vetë kapacitete prodhuese. OST është një nga kompanitë publike që përcakton koston e energjisë elektrike për konsumatorin përmes aplikimit tek Enti Rregulltor i Energjisë.
Në një intervistë televizive, kreu i OST, Skerdi Drenova, tha se për shkak të luftës në Ukrainë dhe rritjes së çmimit në bursa, institucioni është detyruar të rrisë kostot e shpërndarjes së energjisë në vend.
Gjithashtu, ai tha se OST nuk është në gjendje të mirë financiare për shkak të borxheve. Por, faktet tregojnë se arka e OST-së boshatiset për shpenzime luksi për drejtorin dhe stafin.
Këtë mund ta shohim dhe në tenderin e fundit të regjistruar në Agjencinë e Prokurimeve Publike. Bëhet fjalë për prokurimin me objekt “Automjete me qira operacionale leasing”. Për marrjen e këtyre makinave me qira, OST do të shpenzojë 290 milionë lekë.
Këto para mund të investoheshin në përmirësimin e rrjetit për të ulur humbjet në rrjetin e transmetimit të energjisë elektrike tek qytetarët dhe bizneset.
Makina me qira për 5 vjet
Ndërkohë, vihet re se kreu i OST-së është siguruar që këto makina me qira të jenë në dispozicion për më shumë se 5 vjet. Drejtori planifikon jetë luksoze për 5 vjetët e ardhshme! Këto kontrata afatgjata për një shërbim të tillë lënë vend për t’u hetuar! Nëse i referohemi ligjit të prokurimit, këtu kemi të bëjmë me dhënien koncesion të transportit të OST-së.
Gjithsesi, ne konstatojmë se po bëhen shpenzime shumë të larta për një shërbim të tillë. Për të tjerat i mbetet SPAK-ut të hetojë.
Kujtojmë se në vitin 2021, Operatori i Sistemit të Transmetimit propozoi një rritje të tarifës mesatare të transmetimit të energjisë me 96%. Pra, nga 0.75 lekë për kilovat orë që është, në 1.54 lekë për kilovat orë për një periudhë rregullatore 3-vjeçare, 2022-2024, një tarifë mesatare transmetimi prej 1.47 lekë për kilovat orë. Me siguri, “drejtori i luksit” kishte futur në shpenzime edhe makinat me qira!
Qokat e drejtorit me postet në OST
Skerdi Drenova është i njohur për abuzimet dhe organizimin nepotik të OST-së. Para se të emërohej nga Belinda Balluku në krye të kompanisë më 2019, Skerdi ka qenë vartës i Erion Veliajt në Bashkinë e Tiranës. Ai mbante postin e Kryeinspektorit të Mbrojtjes së Territorit. Menjëherë pasi shkoi aty, drejtori i bëri qokën Veliajt duke marrë në punë bashkëshorten e tij.
Ajola Xoxa ka marrë emërimin si “Këshilltare e Jashtme” në Kabinetin e drejtorit të Operatorit të Sistemit të Transmetimit. Paga e saj është sa e një ministri! Dokumenti “marrje në punë” daton në 3 Tetor 2019. Në bazë të këtij dokumenti, Ajola Xoxe do të përfitojë pagën mujore prej 127.500 lekë të reja në muaj (1.2 milionë lekë të vjetra/muaj). Ndërkohë, Ajola është e regjitruar edhe në QKR si konsulente juridike. Pra, kontrata është bërë për të marrë ca lekë Ajola.
Kujtojmë, se Drenova u vu në krye të Operatorit të Sistemit të Transmetimit, duke zëvendësuar Gentian Gradecin. Ky i fundit u detyrua të japë dorëheqjen pas shpërthimit të skandalit me ‘DH-Albania”, një kompani fiktive, e cila kishte arritur të fitonte një tender të majmë nga OST-ja. Rrugën e Gradecit po e ndjek Drenova!
Discussion about this post