Mulliqi kërkon unitet kundër ultranacionalizmit serb

Kosovën para vetes po e presin punë të mëdha, ndër të është edhe takimin me Serbinë i cili do të mbahet në Ohër më 18 mars.

Analisti Skënder Mulliqi në një intervistë për “Bota sot”, ka komentuar mbi gjendjen aktuale në Kosovë.

Ai ka thënë se derisa ultranacionalizmi mbetet ideologji e Serbisë, atëherë nuk do të ketë qetësi në Ballkan. Sipas tij, këto ide duhet të flaken tutje, por si duket po përkëdhelen nga Europa dhe Amerika.

“Deri sa ultranacionalizmi mbetet ideologji e Serbisë, nuk do të këtë qetësi në Ballkan. Idetë serbo-mëdha janë përgjegjëset kryesore për gjenocid, për nisje të luftës dhe për vargun shumë të gjatë të zullumeve mbi popujt jo sllavë me rastin e shpërbërjes së ish-Jugosllavisë.

Në vend që kjo politikë shoviniste të asgjësohet nga Evropa, ajo ende po përkëdhelet! Nëse nuk dënohet një politikë e tillë pushtuese, çdo gjë tjetër mbetet farsë.

Kësaj politike të idesë megallomane “të gjithë serbët në një shtet”, është duke i ardhur në ndihmë Kisha Ortodokse serbe.

Edhe ideja për Ballkan të Hapur, e cila po përkrahet nga Europa dhe Amerika, nuk ka asgjë tjetër veç përkrahje të vullnetit të ideve për botën ruse dhe për botën serbe në rajon.

Kjo është hipokrizi, që botës nuk i sjellë paqe dhe stabilitet”, thotë ai.

Më tej, shton se bota duhet të jetë më e përgatitur sepse jemi në prag të një lufte pas pushtimit rus në Ukrainë.

Prandaj, ai bën thirrje për më shumë unitet mes partive, sepse situata mund të eskalon edhe shumë më rëndë nga hegjemonia ruso-serbe në rajon.

“Bota demokratike duhet të jetë më e përgatitur për një kritikë jo vetëm verbale ndaj ideve të tilla. Kemi ardhur në prag të një lufte me përmasa botërore, pas pushtimit rus në Ukrainë.

Kur bëhet fjalë për ne shqiptarët, sot është dita të marrim guxim që të mbrojmë Kosovën. Se gjendja mund të eskalojë dhe shumë më rëndë nga hegjemonia ruso-serbe në rajon.

Mjaft gjatë e kemi ofenduar vendin duke mos e mbrojtur atë. Ky është paradoksi ynë. Duhet të besojmë më shumë në Zot, se duket shumë e kemi harruar atë.

Gjatë janë mashtruar njerëzit me politika miope, e jo sa duhet kombëtare. Kosova nuk mbrohet nga Serbia duke punuar për poema partiake, në kohën kur na duhet shumë uniteti.

Kosovës dhe shqiptarëve nuk ju duhen kuazi-elitat të cilat e përçanë dhe e ndanë popullin mbi baza partiake dhe ideologjike. Atdheu është mbi të gjitha. Kjo është e vërteta…”, përfundon analisti Mulliqi.

botasot