32 vjet më parë, më 15 mars 1991, u rivendosën marrëdhëniet diplomatike Shqipëri-SHBA.
Pas një shkëputjeje 52-vjeçare prej perëndimit, Shqipëria nënshkroi në Washington Memorandumin e Mirëkuptimit, që parashihte çeljen e ambasadës shqiptare përtej Atlantikut.
Për këtë arsye, në organikën e Ministrisë së Punëve të Jashtme shtoheshin 5 punonjës, një ambasador i jashtëzakonshëm dhe fuqiplotë, dy diplomatë dhe dy punonjës teknikë (shifranti dhe shoferi), njofton Drejtoria e Përgjithshme e Arkivave.
Shpenzimet e nevojshme prej 270 mijë dollarësh për hapjen dhe funksionimin e ambasadës dhe për pajisjen e saj me autovetura dhe me orendi të ndryshme, duheshin përballuar brenda planit të miratuar për vitin 1991.
Ndërsa, ambasada e SHBA-së në Tiranë u hap më 1 tetor 1991, me Kristofer Hill të Ngarkuar me Punë “ad interim”.
Hill u pasua nga ambasadori Uilliam Eduin Rajerson, i cili ia paraqiti kredencialet e tij qeverisë shqiptare më 21 dhjetor 1991.
Drejtoria e Përgjithshme e Arkivave (DPA) publikoi sot dokumentet e nënshkruara nga ministri i jashtëm, Muhamet Kapllani dhe kryetari i Këshillit të Ministrave, Fatos Nano.
Discussion about this post