Ukraina e ka ftuar për vizitë guvernatorin e Floridës dhe kandidatin e mundshëm për president të Shteteve të Bashkuara, Ron DeSantis, pasi ai e përshkroi pushtimin rus të Ukrainës si “mosmarrëveshje territoriale”.
Në SHBA pritet gjerësisht që DeSantis të garoj për president të vendit në zgjedhjet e vitit 2024. Ai e komentoi luftën në Ukrainë në një pyetësor që iu dërgua kandidatëve të mundshëm për president brenda Partisë Republikane.
Ndaj komenteve të DeSantis-it kanë reaguar disa senatorë të partisë, duke e akuzuar për shpërfilljen dhe minimizimin e krimeve të dyshimta të luftës nga Rusia në Ukrainë, raporton televizioni BBC.
“Përderisa SHBA-ja ka shumë interesa jetike kombëtare – sigurimi i kufijve tanë, adresimi i krizës së gatishmërisë brenda ushtrisë sonë, arritja e sigurisë dhe pavarësisë energjetike dhe kontrollimi i fuqisë ekonomike, kulturore dhe ushtarake të Partisë Komuniste të Kinës – ngatërrimi i mëtejmë në një mosmarrëveshje territoriale mes Ukrainës dhe Rusisë nuk është nuk është njëri prej tyre”- shkroi guvernatori në përgjigjen e tij.
Zëdhënësi i Ministrisë së Jashtme të Ukrainës, Oleg Nikolenko, i kritikoi komentet e DeSantis-it dhe publikoi në rrjete sociale një ftesë për të martën.
“Ne jemi të sigurt se si ish-oficer i lartë ushtarak i angazhuar në një zonë luftimesh, guvernatori Ron DeSantis e di dallimin mes një “mosmarrëveshjeje” dhe luftës”- tha Nikolenko.
“Ne e ftojmë atë që ta vizitojë Ukrainën për të marrë një të kuptuar më të thellë të pushtimit të plotë të Rusisë dhe për rreziqet që ai i paraqet ndaj interesave të SHBA-së”- shtoi ai.
As disa anëtarë të Partisë Republikane në SHBA nuk ishin të kënaqur me komentet e guvernatorit të Teksasit. Senatori nga Karolina e Jugut dhe aleati i ish-presidentit Donald Trump, Lindsey Graham, tha se komentet e DeSantis-it paraqesin një “keqkuptim të situatës” nga guvernatori.
Senatori Thom Tillis tha se konflikti nuk është i kufizuar vetëm në Ukrainë. “Ekziston një krizë humanitare. Atje po kryhen krime lufte”- tha ai.
Discussion about this post