Emisioni ‘Stop’ në Tv Klan denoncoi ryshfetin dhe korrupsionin e punonjësve në Portin e Vlorës ndaj qytetarëve që duan të udhëtojnë drejt Italisë. Përmes kamerës së fshehtë, u provua mbi të gjithë vështirësitë që kalon një qytetar dhe paratë që i duhet të paguajë nën dorë.
Denoncimi në media i ryshfetit dhe korrupsionit u ka kushtuar jo pak 3 punonjësve të policisë të Portit të Vlorës, të cilët janë pezulluar nga puna.
Sipas denoncimit për të shkuar drejt Brindizit në Itali nga Porti i Vlorës, qytetarët duhet të paguanin nën dorë plot 170 Euro tek sekseri dhe policët kufitarë, përveç biletës.
Një qytetar që preu një biletë për në Brindizi, në një agjenci pranë Portit të Vlorës fillimisht nuk e lanë të niset pa garancinë e një shtetasi italian. Ndaj, përmes një sekseri ai pagoi para te policët, për të vazhduar më tej drejt destinacionit.
Njoftimi i Policisë:
Në lidhje me rastin e transmetuar në emisionin investigativ “Stop”, për kalim të paligjshëm të kufirit, me dokumente të falsifikuara dhe duke paguar ryshfet tek një punonjës i Policisë Kufitare të portit Vlorë, ju informojmë se:
Drejtoria e Standardeve Profesionale në Policinë e Shtetit ka pezulluar menjëherë nga detyra tre punonjësit e Policisë në PKK Port Vlorë, konkretisht përgjegjësin e turnit nënkomisar Xh. Q, inspesktor P. H., me detyrë kontrollor, si dhe inspektor G. Z., me detyrë trup shërbimi.
Ndaj tre punonjësve të Policisë të lartpëmendur si dhe ndaj shefit të Stacionit të PKK Port Vlorë nënkomisar Y. D, Drejtoria e Standardeve Profesionale ka nisur hetimin e thelluar disiplinor, ndërsa nga AMP ka nisur hetimi penal.
Policia e Shtetit falënderon gazetarët e emisionit “Stop” dhe fton sërish mediat dhe qytetarët që të denoncojnë çdo rast të abuzimit me detyrën nga ana e punonjësve të Policisë, duke iu garantuar reagim të menjëhershëm.
Policia e Shtetit është shumë e vendosur për të larguar nga radhët e saj, punonjësit që abuzojnë me detyrën dhe cenojnë besimin e qytetarëve të Policia.
Discussion about this post