Kandidati i opozitës për bashkinë e Tiranës në zgjedhjet e 14 majit, Belind Këlliçi zhvilloi një takim të rinj nga zona e Devollit, të cilët banojnë në Tiranë. Një nga shqetësimet e ngritura nga studentët, ishte çështja e transportit urban në Tiranë. Për këtë problem, Këlliçi u shpreh se për zgjidhjen e transportit urban në kryeqytetm, mjaftojnë paratë që aktualisht shkojnë për trajtimin e mbetjeve urbane në Sharrë, ku nuk ekziston inceneratori.
“E dini t`ua them me shifra se sa kushton trajtimi dhe djegia e plehrave, që nuk ndodh. Pra paguan një shërbim që nuk ndodh. 14 milionë euro në vit, pra është 1.3 milion euro në muaj. Mjaftojnë këto lekë që të zgjidhet e gjithë problematika e transportit urban në TIranë”, u shpreh ai para studentëve.
Këlliçi deklaroi se gara për 14 majin nuk është as për flamur dhe as për logo, por për të ardhmen e vendit. “Nuk luhet këtu çështja politike, këtu luhet e ardhmja e vendit tonë. Nuk është aspak çështje partie, logoje, flamuri etj, është çështje e të ardhmes së vendit. A do vendosim të rrimë këtu, a do vendosim ta ndryshojmë, apo do vendosim të ikim”-tha Këlliçi.
Problemet e Tiranës
Duke e ngritur largimin e të rinjve si shqetësim kryesor gjatë bashkëbisedimit, kandidati i opozitës për bashkinë e Tiranës tha se me ritmet aktuale të largimit të të rinjve, shteti do të shkojë në faliment
“Kanë ndryshuar shumë situatat në Shqipëri gjatë këtyre 8 viteve. Janë rikthyer gomonet. Kanë ikur miqtë tanë. Nëse vazhdojmë të ikim me këto ritme, kush do e çojë para këtë vend, bie, falimenton shteti, se nuk ka më krah pune”, tha ndër të tjera Këlliçi.
Kandidati opozitës për Bashkinë Tiranë, preku edhe disa probleme thelbësore që shqetësojnë qytetarë e Tiranës dhe të rinjtë. Këlliçi u shpreh se qytetarët e Tiranës e paguajnë tre herë ujin, por ai nuk pihet, ndërsa bashkë me faturën e ujit paguajnë tarifën e arsimit, e cila nuk është përkthyer në investime për shkolla dhe çerdhe, duke sjellë si shembull zonën e Astirit.
“Paguajmë tre herë për ujin: njëherë faturën për UKT, një herë e paguajmë duke e blerë në markete dhe një herë për pompën. Por tek ajo fatura e ujit paguajmë një taks antikushteuse që është për shkolla. 42 milionë euro kanë paguar qytetarët në Tiranë dhe janë bërë 17 shkolla, të cilat bëhen disa herë më shtrenjtë se në BE”, – tha Këlliçi.
Discussion about this post