Shehu deklaron se Rama po i bën karshillëk DASH me sulmin ndaj resortit

Deputeti i PD-së, Tritan Shehu ka deklaruar se sulmi i qeverisë ndaj “Prestige Resort” ishte një përqeshje e raportit të DASH.

I ftuar në “Panorama TV”, Shehu u shpreh se konfiskimi i godinave në mënyrë të paligjshme dhe pa asnjë vendim gjykate “ishte një arrogancë totale, ku shteti kërkon të terrorizojë mediat, si edhe qytetarët.”

Deputeti demokrat theksoi se fundi i Ramës po vjen pasi “gota është mbushur plot dhe po derdhet”.

Tritan Shehu: “Pa një vendim gjykate nuk bëhen këto veprime, ishte një abuzim, arrogancë totale ku shteti kërkon të terrorizojë mediat, por edhe gjithë qytetarët.

Mesazhi ishte kur i bëj një medie këtë gjë, imagjino çfarë i bëj një qytetari. Ka një mllef kundër lirisë, ndaj Perëndimit, Evropës.

Ka karakteristikat e një autokrati, ata janë modeli i tij jo demokracitë. Ai mendon se të gjithë janë skllevërit e tij.

Është një drejtësi e kapur, edhe me shembjen e Resortit drejtësia duhet të kishte vepruar. Por është e kapur. Si mund të zgjidhet? Ka vetëm një rrugë, është lëvizja popullore, rezistenca popullore. Nuk shoh rrugë tjetër.

Mirë do ishte që lëvizjet të jenë të larmishme, nga sindikatat, dhe partitë politike, duhet të jenë të kombinuara, për të goditur këtë regjim.

Vendimi për konfiskim e Prestige ishte përqeshje e raportit të DASH, zhvlerësim i këtij raporti, që “unë nuk pyes” dhe karshillëk ndaj DASH “bëj si të dua, jam sulltan”.

A i ka ardhur fundi kryeministrit Rama dhe qeverisjes së tij?

Tritan Shehu: Absolutisht, konditat janë të plota. Unë mendoj që gota është mbushur plot, po derdhet. Duhet një reagim i fortë popullor dhe pastaj është vota e 14 majit, që të mos deformohet, duhet paraprirë me një lëvizje popullore që të bëjë të mundur përcaktimin e linjave të pushtetit të ardhshëm politik në Shqipëri.

/Panorama