Policia e Shkodrës ka finalizuar operacionin “North Forex”, në kudër të të cilët kanë rënë në pranga tetë persona, ndërsa janë shpallur në kërkim tre të tjerë për mashtrim me anë të platformave dhe programeve kompjuterike, ose ndryshe Call Center.
Mësohet se, këta persona prej një periudhe 1-vjeçare kishin krijuar një skemë që kryesohej nga një polak që kishte rekrutuar si menaxherë tre qytetarë shqiptarë. Kjo skemë ushtrohej në lokacione të ndryshme dhe konsistonte në mashtrimin kompjuterik nëpërmjet programeve dhe platformave të ndryshme si Vicidial, Forex dhe Exchange, në dëm të gjermanëve dhe spanjollëve.
Nga hetimet e deritanishme rezulton se polaku me iniciale P.Ë., me qëllim shmangien e hetimit pas operacionit kombëtar kundër mashtrimeve kompjuterike, kishte bërë çregjistrimin e të gjithë punonjësve dhe kishte vijuar ta ushtronte aktivitetin në fjalë në mënyrë të fshehtë.
Policia njofton se po vijojnë hetimet për verifikimin e të gjitha investimeve në pasuri të luajtshme dhe të paluajtshme që kanë bërë personat e përfshirë në ketë veprimtari, në koordinim dhe me autoritetet gjermane, spanjolle dhe polake, me qëllim konfiskimin e te gjitha aseteve të përfituara nga kjo veprimtari e paligjshme.
Më herët, SPAK kishte vënë nën hetim 13 kompani Call Center me qendër në Tiranë, pasi dyshohet se kanë mashtruar me shuma të mëdha parash një numër të konsiderueshëm qytetarësh nga Bashkimi Europian.
Discussion about this post