Kryetari i Bashkisë së Bulqizës, Lefter Alla ka reaguar lidhur me rrugën që bëri xhiron e rrjetit në median sociale. Kjo pasi siç mund të shihet nga fotot, nuk bëhet fjalë për një rrugë të vërtetë dhe me standarde, por një improvizim me dy korsi betoni dhe që ka formën e një kanali.
Pas shumë reagimeve, Alla është shprehur se dhe ai vet ka qeshur me postimet e publikuara kudo në rrjete sociale, teksa thekson se ka një sqarim për të bërë.
“Pas gjithë gazit e haresë së rrjetit, ku në jo pak raste edhe vetë qesha me nivelin e mundshëm të delirit të njerëzve, mendova se duhen thënë dy tre fjalë për të gjithë ata që ‘jetojnë në Instagram’.”
Alla mes rreshtave rrëfen peripecitë e tij si kreu i Bashkisë Bulqizë, për të shtruar rrugën në foto, për të cilën thekson se ka punuar me vetëm dy fadroma për të vlerësuar dinjitetin e qytetarëve.Alla pason përgjegjësitë tek buxheti që shteti ka përcaktuar për bashkinë që ai përfaqëson, që siç ai thekson bashkitë kategorizohen si e nënës dhe e njerkës.
“Jo, zotërinj, jo! Ju nuk i dini mundësitë që ofrojnë buxhetet e bashkive të vogla. E pas çdo përpjekje për të bërë diçka, sërish komentoni e komentoni të hipnotizuar brenda botës tuaj në Instagram.
Po, zotërinj, po! Me vetëm dy fadroma që kanë punuar pa pushim në shtatë ditë të javës bëmë atë që s’ishte bërë në pothuajse tre dekada nga paraardhësit e mi në detyrë. Me vetëm dy fadroma të bashkisë arritëm tek të gjithë, duke vlerësuar njeriun e dinjitetin e tij, e duke përçmuar çdo praktikë të shëmtuar që ndër vite i ka kategorizuar atë në të nënës e të njerkës.”
Kreu i Bashkisë së Bulqizës pranon realitetin e qytetit të tij që siç vet ai rrëfen janë pafund zona që s’kanë patur kurrë investim nga pushteti.
“Duam apo s’duam, pa përjashtuar edhe veten time nga përgjegjësia që kam e mund të kem pasur ndër vite, Shqipëria jonë është kjo, me qytete që lënë për të dëshiruar, me fshatra të harruar, me rrugë të pashtruara, me probleme pafund në shëndetësi, arsim, kulturë e kudo tjetër.
Janë pafund zonat e thella malore të cilat s’kanë pasur asnjëherë fatin të njohin dorën dhe investimet e shtetit, e aq më tepër, banorët e tyre nuk dinë se ç’është instagrami, facebook-u, apo rrjetet e tjera sociale. “
Lefter Alla drejton Bashkinë e Bulqizës që më datë 5 gusht të vitit 2019.
Discussion about this post