Kryeministri Edi Rama, sa herë që i drejtohen pyetje për korrupsion, vjedhje dhe abuzime, të cilat kanë çuar pas hekurave jo pak zyrtarë madje edhe ministra të tij, jo vetëm nuk e pranon, por tashmë e ka gjetur edhe “armikun media”, si model korrupsioni.
Edhe sot ai është kapur përsëri me mediat dhe gazetarët gjatë konferencës krah përfaqësuesit të Bankës Botërore, Emanuel Salinas.
Rama iu kthye ashpër një prej gazetarëve në lidhje me pyetjen për raportin e Transparency International për korrupsionin në Shqipëri dhe arrestimet e bujshme nga ish-qeveritarët.
“Pyetja ishte mbresëlënëse, ti nuk flet për qeverisje të korruptuar, sepse detyra numër 1 e atij që ka një penë është të mos shtrembërojë të vërtetën. Ti flet për korrupsionin që nuk është një fenomen pjesor, por merret me të gjithë sektorët e jetës, të gjitha pushtetet, pushtetin ekzekutiv, gjyqësor dhe median që është një vatër korrupsioni që duhet të pastrohet jo nga qeveria, por nga autorregullimi. Media është modeli i korrupsionit kriminal, që bazohet te shantazhimi, gjobëvënia e bizneseve, gjobëvënia për përfitime të padeklaruara sepse janë kriminale.
Siç nuk janë të gjitha mediat të korruptuara, ka segmente të korruptuara dhe kriminale, pastrim parash dhe evazion fiskal me përmasa të mëdha. Folëm me shfrytëzim të punës por shfrytëzimi i gazetarëve në Shqipëri është pjesë e kësaj. Këtë mos ia thoni njeriut, në fund të ditës mos harroni që jemi të gjithë shqiptarë, dhe këto pyetje që ua bëni të huajve se është vendi ynë. Ça do të thotë kjo, një ministër në burg, dy në burg? Ça do të thotë? Unë këtë kam pritur dhe kërkuar nga Reforma në Drejtësi, që të luftohet korrupsioni nga drejtësia pa hyrë kurrë në mes pushteti politik dhe ekzekutiv.”, tha Rama.
Discussion about this post