Arrestohet në flagrancë 39-vjeçari me precedent penal të mëparshëm në fushën e krimeve ndaj personit dhe armëmbajtjes pa leje, Gjovalin Gjoka,i cili shpërndante lëndë narkotike kokainë në qytetin e Tiranës dhe Durrësit. 39-vjeçarit i janë sekuestruar 400 gramë kokainë, një sasi dozash gati për shitje, një aparat celular dhe një automjet.
Nga hetimet e kryera nga Seksioni i Hetimeve për Narkotikën, Tiranë, u sinjalizuan se një shtetas posedonte dhe shpërndante lëndë narkotike kokainë në disa qytete.Pas nisjes së operacionit për kapjen e autorit, u bë i mundur arrestimi i tij në flagrancë në zonën e ish-Stacionit të Trenit.
Gjovalin Gjoka, 39 vjeç, banues në Shën Vlash, Durrës, rezulton i dënuar më parë për veprat penale “Vrasja me dashje” dhe “Armëmbajtja pa leje”.
Personi me precendent penal, mësohet se pasi siguronte lëndën narkotike në sasi prej 200-500 gramë, në zonën e Shijakut, e ndante në porcione nga 10 gramë deri në 100 gramë, të cilat më pas i shiste me shumicë në zonën e “Bulevardit të Ri”, në ish-Stacionin e Trenit dhe në zonën e “Zogut të Zi“, në qytetin e Tiranës, po ashtu në Durrës dhe në Shijak, kundrejt vlerës 8000 lekë të rinj për gramë.
Klientët që blinin lëndën narkotike i priste në stacione autobusësh, për shmangur ekspozimin ndaj bluve. 39-vjeçari e kryente këtë aktivitet kriminal dy herë në javë.
Materialet i kaluan Prokurorisë së Rrethit Gjyqësor Tiranë, për veprime të mëtejshme, për veprën penale “Prodhimi dhe shitja e lëndëve narkotike”.
Discussion about this post