Dom Gjergj Meta përmes një videomesazhi uroi sot të gjithë besimtarët katolikë për Pashkët.
Në mesazhin e tij ai vuri theksin tek konfliktet që po zhvillohen sot në botë, tek korrupsioni dhe padrejtësitë sociale.
“Simboli më domethënës dhe më shprehës i mëngjesit të Pashkës është pikërisht varri bosh.
Gratë dhe dishepujt më pas shkojnë tek varri dhe më pas varri i parë që ata takojnë është varri bosh.
Ne e dimë se varri është shenja e dekompozimit, kutërbimimit. Është një simbol i fuqishëm. Por varri bosh në të djelën e pashkëve do të thotë se Krishti nuk është aty, është ringjallur. Pikërisht në shenjën e këtij varri bosh dishepujt janë të thirrur të besojnë.
Në këtë mëngjes pashkësh për shumë varre të hapura, të ekzistencave të palumtura, të zemrave të vrara nga humbja e njerëzve të dashur. Varre të ekzistencave të nëpërkëmbura nga padrejtësi sociale, nga sistemet e korrupsionit, nga ata që përpiqen të shfrytëzojnë të tjerët, pasuritë e të tjerëve për qëllimet e tyre vetjake.
Kam menduar varret e luftërave të ndryshme sot në botë. Shenja që ne jemi në Pashkë do të ishte që këto varre të ishin bosh.
Sa do të doja qe në këto ditë pashke të dëgjoja zërin e Krishtit që thotë: çohu ti që je i përgjumur, ti je që i fjetur. Sa do të doja që këto varre të ishin bosh. Në këtë të dielë pashkësh t’ju uroj të gjithëve: Gëzuar Pashkët! Krishti u ngjall!”
Discussion about this post