Nga asfalti elektoral te rritja e pagave e shpërblimeve, fryrja e administratës, premtime për projekte që mund të ishin realizuar gjatë këtij mandati katërvjeçar… Lista e marifeteve të Rilindjes për të joshur votuesit është e gjatë. Në këto vite pushteti, kanë treguar se janë mjeshtra të manipulimit e sidomos kur vjen fjala te zgjedhjet – një dritare që u tregon horizontin e një pushteti më të zgjatur, që u jep më shumë mundësi dhe kohë për të korrur frytet e ëmbla të tij…
Skema e radhës tinëzare u përdorur nga ministri i Drejtësisë Ulsi Manja, njëkohësisht drejtues politik i Partisë Socialistë për qarkun e Dibrës.
Këtë të Martë, në një komunikim për mediat, ai premtoi amnisti për të burgosurit.
Zoti Ulsi u kujdes që të vinte në dukje se amnistia do të bëhej pikërisht pas zgjedhjeve në mënyrë që të shmangej ndonjë keqkuptim i mundshëm se kjo po përdorej për fushatë elektorale.
“Një nga arsyet që edhe shtymë amnistinë ishin zgjedhjet për të shmangur çdo lloj alibie. Pas zgjedhjeve drejtoria e përgjithshme e burgjeve do përgatisë një draft të ligjit për amnistinë”, u shpreh ai.
Megjithatë, premtimin zgjodhi ta bënte ekzaktësisht 1 muaj e 3 ditë nga zgjedhjet lokale të 14 Majit.
Por, nëse ishte vërtet i shqetësuar se premtimi për amnisti mund të interpretohej si një marifet për të blerë votat e te burgosurve, pse e bëri tani? Pse nuk priti mbarimin e zgjedhjeve?
Pyetjet ngrenë natyrshëm dyshime për arsyen e vërtetë të lëvizjes së Ulsi Manjës.
Aplikimi i një amnistie të mundshme për të burgosurit u përfol në media se mund të kryhej në prag të festave të fundvitit. Vetë ministri e mohoi dhe ashtu ndodhi. Amnisti për të burgosurit nuk pati asokohe.
Mesa duket, Ulsi Manja e ka kalkuluar që të përdorej si një premtim elektoral para zgjedhjeve lokale të 14 Majit.
Discussion about this post