Atletico Madrid fitoi titullin kampion në Spanjë ditën e djeshme. I 11-ti në histori për “Colchoneros”, të cilët rikthehen në majën e La Liga pas shtatë vitesh. Festa e madhe për tifozët, të cilët përjetuan drithërima të forta pas fitores me përmbysje ndaj Valladolid (1-2).
Për fat të keq, njëri prej tyre ka humbur jetën duke festuar. Mediat spanjolle raportojnë se një 14-vjeçar, i cili po festonte në një fugon bashkë me miqtë e tij, ka goditur kokën me murin e një parkimi nëntokësor, teksa po festonte në dritaren e fugonit.
Edhe pse iu dha menjëherë ndihma e parë dhe u dërgua në spital, adoleshenti nuk ia doli të shpëtonte dhe ndërroi jetë. Festë që u kthye në një tragjedi të vërtetë.
