Ish-sekretari republikan i shtetit i SHBA-së, Mike Pompeo njoftoi se ai nuk do të jetë kandidat për president. Lajmin e dha para garës brenda partisë, para zgjedhjeve presidenciale të vitit 2024. Për rrjedhojë, ai nuk do të jetë ndër kundërshtarët e ish-presidentit Donald Trump, në mandatin e të cilit edhe shërbeu si sekretar.
Pompeo, 59 vjeç, tha se vendosi pas diskutimeve me gruan e tij të mos kandidonte për president.
“Koha nuk është e duhur për mua dhe familjen time,”- shpjegoi ai.
Si një ish-kongresmen nga Kansas dhe ish-drejtor i CIA-s, Pompeo kishte një reputacion si një aleat i vendosur i Trump. Kjo pasi ai zbatoi vendimet shumë të diskutueshme të Trump për politikën e jashtme.
Mike Pompeo fillimisht mbështeti pretendimet e Donald Trump se i ishin “vjedhur” zgjedhjet e vitit 2020, megjithëse më vonë ai bashkëpunoi në procesin e tranzicionit. Në muajt e fundit, ai ka kritikuar në mënyrë indirekte ish-presidentin, duke thënë se republikanët kanë nevojë për liderë që nuk kanë ngecur në të kaluarën.
Me Pompeon jashtë kandidimit, sfiduesi i vetëm i Donald Trump në garë është zyrtarisht ish-ambasadorja e administratës së tij në Kombet e Bashkuara dhe ish-guvernatorja e Karolinës së Jugut, Nikki Haley. Por senatori i Karolinës së Jugut Tim Scott, Guvernatori i Floridës Ron DeSandis dhe ish-zëvendëspresidenti Mike Pence konsiderohen gjithashtu pretendentë të mundshëm për nominimin republikan.
Discussion about this post