U mbajt peng nga bashkëjetuesi, e reja: Kam tentuar të vras veten

28-vjeçarja, viktimë e dhunës nga bashkëjetuesi i saj Gleart Gusholli rrëfen tmerrin që ka përjetuar gjatë ditëve kur u mor peng.

Në një intervistë për emisionin “Opinion” në Tv Klan, e reja thotë se Gusholli përveç dhunës fizike të ushtruar ndaj saj, e kishte kërcënuar edhe se do i publikonte video të saj nudo në internet.

“Javën e parë e kisha lirinë time, javën e dytë pashë tmerrin me sy. Aty më thoshte mua se çfarë ke bërë këta 3 muajt e fundit, me kë je takuar. Nuk më jepte më telefonin as të flisja me familjarët e mi. Nuk dilja më nga shtëpia, as unë dhe as ai. Grilat kanë qenë poshtë. Më dhunonte me çdo gjë, me thikë, me këmbët e tavolinës, më kërcënonte, do të nxjerr video ku ke dalë nudo në internet. M’i kishte bërë ai”, tregon e reja.

28-vjeçarja rrëfen mes dhimbjes se ka dashur që t’i japë fund jetës duke u hedhur nga kati i pestë i pallatit teksa thotë se nuk e ka lënë bashkëjetuesi i saj pasi i thoshte që do të ja merrte ai jetën me dorën e tij.

“Kam tentuar disa herë që të hidhesha nga kati i 5. Kam bërtitur disa herë dhe komshinjtë nuk kanë reaguar. Kam tentuar disa herë që të vras veten. I thoja që do të vras vetëm që ky horror të merrte fund. Ky nuk më linte më thoshte që do të ta marr jetën avash-avash dhe do t’i bëj gjërat me dorën time”, thotë 28-vjeçarja.