Kanë përfunduar edhe ndeshjet e fundit, të fazës çerekfinale të UEFA Champions League duke e plotësuar kështu kuadrin e raundit gjysmëfinal të kompeticionit elitar të futbollit europian.
Pas avancimit, të dy klubeve legjendare të kompeticionit, Real Madrid dhe AC Milan, biletën për në fazën e katër më të mirave të Europës, e kanë siguruar gjithashtu, Inter dhe Manchester City.
Zikaltërit, respektuan parashikimet e pragsfidës, duke mos lejuar portugezët e Benficës që të vinin në diskutim çështjen e kualifikimit për në fazën tjetër.
Me një avantazh prej dy golash të akumuluar nga sfida e parë, zikaltërit barazuan në takimin e kthimit (3-3), për t’i dhuruar kështu, tifozëve të tyre një gjysmëfinale ëndrrash, përballë Milanit, një euroderbi që vjen në Champions, për herë të parë që nga viti 2005.
Ndërkohë Real Madrid, do të masë forcat me Manchester City, që siguroi biletën për në gjysmëfinale, falë barazimit 1-1, në mbrëmjen e sotme si dhe, mbi të gjitha, falë fitores bindëse (3-0) në takimin e parë, përballë Bayern Mynih.
Gjermanët u treguan të pasaktë përballë portës së City-t duke mos konkretizuar siç duhet rastet e shumta të krijuara për të rihapur çështjen e kualifikimit. Penalltia e shënuar nga Kimish në fund të takimit ishte e pamjaftueshme për të rindezur shpresat për kualifikim.
“Citizens” tashmë kanë mundësi të hakmerren për eliminimin në gjysmëfinale, të shkaktuar nga “Los Blancos” sezonin e kaluar.
Takimet gjysmëfinale të Champions League, do të luhen në muajin maj.
/m.b. /gijotina.com
Discussion about this post